शैलुङ घुम्ने आन्तरिक र बाह्य पर्यटक बढ्दै
रामेछाप : रामेछाप र दोलखाको सिमानामा रहेको धार्मिक तथा पर्यटकीय स्थल शैलुङ घुम्न आउने पर्यटकको संख्या क्रमशः बढ्दै गएको छ।
रमणीय दृश्यावलोकन गर्न पाइने भएको कारण शैलुङ घुम्न आउने आन्तरिक र बाह्य पर्यटकको संख्या पछिल्लो समय बढ्दै गएको छ।
शैलुङ खोलाखर्क होमस्टे बजार तथा पर्यटन प्रवर्धन समितिका अध्यक्ष दावासङ्बु शेर्पाका अनुसार गएको हिउँददेखि यस पटकको दशैंतिहारसम्म करिब ५० हजार पर्यटक शैलुङ घुम्न आएका छन्।
यो वर्ष पर्यटकको संख्या दोब्बर हुने अनुमान शेर्पाको छ। उनले होमस्टे सधैँ नै भरिने गरेको सुनाए।
‘आज पनि शैलुङका सबै होमस्टे प्याक छन्। तीज, दशैं, हिउँदमा हिउँ परेको बेला तथा नयाँ वर्षमा मानिसहरूको ठूलो भीड लाग्ने गर्छ। त्यति बेला त मेला जस्तै हुन्छ, टेक्ने ठाउँ हुँदैन,’ शेर्पाले भने।
सुन्दर हिमालको दृश्यावलोकनका साथै हिउँ खेल्न र चौँरी हेर्न पर्यटकहरू शैलुङ पुग्ने गर्दछन। चैत-वैशाखमा फुल्ने विभिन्न थरिका गुराँसले शैलुङलाई मनमोहक बनाउने गर्दछ।
त्यस्तै वर्षामा फुल्ने विभिन्न जातका भुइँफूलले पर्यटकलाई त्यतिकै लोभ्याउँछ। यसबाहेक हिन्दु र बौद्धधर्मालम्बीहरू शैलुङको धार्मिक यात्रामा जाने गर्दछन्। शैलुङलाई यी दुवै धर्मावलम्बीले तपोभूमिको रूपमा लिने गर्दछन्।
शैलुङसम्म पुग्ने सडक निर्माण र प्रचार बढ्दै गएपछि पर्यटक बढेका छन्। अहिले शैलुङमा नेपालका अधिकांश भागका साथै विदेशी पर्यटक पनि आउन लागेका शेर्पाले बताए।
‘विदेशी पनि बाक्लै आउँछन्, काठमाडौं, ललितपुर, भक्तपुर, काभ्रे लगायतका जिल्लाबाट आउनेको संख्या अधिक छ। तराई र इण्डियाबाट पनि मानिस आउँछन्’, शेर्पाले थपे।
सय लुङ अर्थात् सयवटा थुम्काबाट शैलुङको नामाकरण भएको हो। प्राकृतिक रूपमा उत्पत्ति भएका एक सय भन्दा बढी थुम्का शैलुङमा छन्। थुम्काहरूमा गलैँचा ओछ्याएझैँ दुबोले ढाकेको छ। हिउँदमा ती थुम्कालाई हिउँले ढाक्दा अझ मनमोहक देखिन्छ।
समुन्द्री सतहदेखि ३३ सय मिटर उचाइमा रहेको शैलुङमा सधैँ चिसो हुन्छ। हिउँदमा हिउँ पर्ने शैलुङमा बर्खामा पनि चिसो हावा चल्छ।
अहिले शैलुङ जान कठमाडौंबाट बीपी मार्गको नेपालथोक वा सित्खा हुँदै छिर्ने छोटो बाटो छ। रामेछापको सदरमुकाम मन्थली वा सिन्धुपाल्चोकको मुढे बजारबाट घुमेर आउने बाटो पनि छ।
२ मंसिर, २०८०, १०:४४:२२ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
