जनप्रतिनिधि भएको चार वर्ष पुगेको भन्दै बागलुङ नगरपालिकामा सार्वजनिक बिदा

बागलुङ : बागलुङ नगरपालिकाले जनप्रतिनिधिहरूले पदबहाली गरेको चार वर्ष पुगेको उपलक्ष्यमा जेठ ६ गते नगरपालिकाभर सार्वजनिक बिदा दिने निर्णय गरेको छ।

नगरपालिकाको यो निर्णयको अहिले सामाजिक सञ्जालमा ‘अर्थ न वर्थको बिदा’ भन्दै आलोचना भइरहेको छ।

नगरपालिकाद्वारा प्रकाशित सूचना अनुसार, वर्तमान जनप्रतिनिधिहरूले पद सम्हालेको चार वर्ष पुगेको खुशियालीमा ‘विकास र समृद्धिको यात्रामा हाम्रो चार वर्ष’ नामक विशेष कार्यक्रम आयोजना गर्न लागिएको छ।

सोही कार्यक्रमको प्रयोजनका लागि जेठ ६ गते नगरपालिकाको कार्यालय, मातहतका वडा कार्यालयहरू, स्वास्थ्य संस्थाहरू र शैक्षिक संस्थाहरूमा स्थानीय बिदा दिने निर्णय गरिएको हो।

प्रमुख प्रशासकीय अधिकृत ईश्वरी प्रसाद शर्माद्वारा हस्ताक्षर गरिएको सूचनामा बिदाका कारण सेवाग्राहीमा पर्न जाने असुविधाप्रति क्षमा मागिएको छ।

तर, नागरिकहरूले भने जनप्रतिनिधिको कार्यकालको उत्सव मनाउन विद्यालय र स्वास्थ्य संस्था जस्ता संवेदनशील क्षेत्र समेत बन्द गराउनु गैरजिम्मेवारपूर्ण भएको बताएका छन्।