रक्सी खाएर श्रीमतीलाई कुटपिट र मन्जुरी बिना करणी गरेको आरोपमा एकजना पक्राउ

काठमाडौं : श्रीमतीलाई कुटपिट गरेको आरोपमा एक जना पक्राउ परेका छन्।

पक्राउ पर्नेमा मुगुको छायाँनाथ रारा नगरपालिका-११ का २८ वर्षीय कृष्ण कुमाई छन्। उनले आफ्नी श्रीमतीमाथि पटक-पटक कुटपिट गर्दै घरेलु हिंसा गरेको आरोप छ।

गत कात्तिक २० मा उनले श्रीमती पदमकला साउदमाथि चिर्पटले आक्रमण गरेका थिए। साउद गाई चराउन जंगलमा गएका बेला उनले त्यहीँ पुगेर दाउराको चिर्पट प्रहार गरेका थिए। 

त्यसपछि घाइते भएकी उनको उद्धार गरी जिल्ला अस्पताल पुर्याइएको थियो। त्यहाँ उपचार हुन नसकेपछि साउदलाई पछि वडाध्यक्ष कन्जुमा कुमाईले उद्धार गरी जिल्ला अस्पताल पुर्याइएको थियो।

पटक-पटक मदिरा सेवन गर्दै कुटपिट गरेको र घरेलु हिंसा गरेको, मन्जुरी बिना करणी गर्ने गरेको भन्दै श्रीमतीले मुगु प्रहरीमा जाहेरी दिएकी थिइन्। गएको बिहीबार राति पुनः मदिरा सेवन गरेर कुमाईले श्रीमतीमाथि कुटपिट गरेपछि प्रहरीले पक्राउ गरेको हो।

प्रहरीले श्रीमान कृष्णमाथि अनुसन्धान अघि बढाएको छ। 

पुष ३, २०८१ बुधबार १४:४२:३० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।