‘नडराऊ रवि दाइ, जनता तिम्रो साथमा छ’

काठमाडौं : पोखराबाट काठमाडौं ल्याइएका राष्ट्रिय स्वतन्त्र पार्टी (रास्वपा)का सभापति रवि लामिछानेका समर्थकहरूले त्रिभुवन विमानस्थलबाहिर नाराबाजी गरेका छन्। प्रहरीको गाडीमा रविलाई निकालिँदा विमानस्थलको गेटबाहिर उनका समर्थकले नाराबाजी गरे।

उनीहरूले ‘नडराऊ रवि दाइ, जनता तिम्रो साथमा छ,’ ‘राजनीतिक प्रतिशोध बन्द गर’लगायत नारा लगाएका थिए।

काठमाडौंको स्वर्णलक्ष्मी सहकारीको बचत अपचलन गरेको आरोपमा काठमाडौं जिल्ला अदालतले पक्राउ पुर्जी जारी गरिसकेकाले बयानका लागि रविलाई बिहीबार साँझ विमानमार्फत काठमाडौं ल्याइएको हो।

पोखराको सूर्यदर्शन बचत तथा ऋण सहकारी संस्थामा सहकारीको रकम ठगी र सङ्गठित अपराध कसुरमा गत कात्तिक २ मा पक्राउ परेका लामिछानेलाई जिल्ला प्रहरी कार्यालय कास्कीको हिरासतमा राखेर अनुसन्धान भइरहेको छ। उनलाई बयानका लागि यसअघि रुपन्देही लगेर पुनः पोखरा ल्याइएको थियो। 

रविलाई जिल्ला प्रहरी परिसर काठमाडौंमा लगिएको छ। 

भोलि जिल्ला सरकारी वकिलको कार्यालय काठमाडौंमा रविको बयान हुने बताइएको छ। 

मंसिर १३, २०८१ बिहीबार १९:०९:३७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।