सामाजिक सञ्जालबाट चरित्र हत्या गरेको आरोपमा एक महिला पक्राउ

काठमाडौं : सामाजिक सञ्जालबाट चरित्र हत्या हुने अभिव्यक्तिहरू प्रसारण गरी आघात पुर्याएको आरोपमा केन्द्रीय साइबर ब्यूरोले कैलालीकी एक महिलालाई पक्राउ गरेको छ। 

पक्राउ पर्नेमा कैलालीको धनगढी उपमहानगरपालिका-१३ की कुमारी जानकी बोगटी रहेकी केन्द्रीय साइबर ब्यूरोका प्रमुख डिआइजी नविन्द अर्यालले जानकारी दिए।

उनका अनुसार पक्राउ परेकी बागटीले सामाजिक सञ्जालमा चरित्र हत्या हुने अभिव्यक्तिहरू प्रसारण गरी चरित्रमा निर्मम आघात पुर्याउनुका साथै सामाजिक जीवनमा गम्भीर असर पुर्याउने कार्य गर्ने उपर आवश्यक अनुसन्धान गरी कारबाहीका लागि ब्यूरोमा पीडित महिलाको निवेदन प्राप्त भएपछि पक्राउ गरिएको हो।

जिल्ला प्रहरी कार्यालय सुर्खेतको सहयोगमा उनलाई सुर्खेतबाट पक्राउ गरी केन्द्रीय साइबर ब्यूरो काठमाडौंमा ल्याइ जिल्ला अदालत काठमाडौंबाट पाँच दिनको म्याद थप गरिएको डिआइजी अर्यालले बताए। 

पक्राउ परेकी बोगटी उपर विद्युतीय (इलेक्ट्रोनिक) कारोबार ऐन, २०६३ अन्तर्गतको कसुरमा मुद्दा दर्ता गरी आवश्यक अनुसन्धान कार्य भइरहेको केन्द्रीय साइबर ब्यूरो काठमाडौले जनाएको छ।    

कात्तिक २९, २०८१ बिहीबार २१:५६:०९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।