युरोपेली क्लबविरुद्ध रोनाल्डोले गोल गर्न सकेनन्, अल नासर लगातार दुई खेलमा पराजित

स्टार खेलाडी क्रिस्टियानो रोनाल्डो आबद्ध साउदी क्लब अल नासरले लगातार दोस्रो खेलमा पनि हार बेहोरेको छ। 

युरोपेली क्लब (पोर्चुगिज) बेन्फिकासँग अल नासर ४-१ गोलअन्तरले पराजित भएको हो। यसअघि क्लबले स्पेनको क्लब सेल्टा भिगोसँग पनि ५-१ को फराकिलो हार बेहोरेको थियो। 

बिहीबार क्लब मैत्रीपूर्ण खेलमा बेन्फिकाविरुद्ध ८४ मिनेटमा खेलेका रोनाल्डोले कुनै पनि गोल गर्न सकेनन्। बेन्फिकाका लागि भने अर्जेन्टिनी विंगर एन्जल डी मारियाले खाता खोलेका थिए। यस्तै गोन्कालो रामोसले दुई गोल गरे। 

डी मारियाले २३ औं मिनेटमा गोलको खाता खोलेका थिए। त्यसपछि रामोसले ५ मिनेटको अन्तरमा २ गोल गर्दै बेन्फिकालाई ३-० को अवस्थामा पुर्याएका थिए। 

४२ औं मिनेटमा साउदी टोलीका लागि सुल्तान अल घानमले एक गोल फर्काए पनि दोस्रो हाफमा बेन्फिकाका लागि आन्द्रिएस सेल्देरूपले अर्को गोल थप्दै ४-१ को जित दिलाउन सफल भए। 

साउन ५, २०८० शुक्रबार ०८:५०:५१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।