ब्याच नम्बर ६९ः नेपालका केही प्रभावशाली नेता 'हनी'सँगै 'मनी' ट्रयापमा परेका देखिन्छन्

हेमन्त मल्ल

१ वर्ष अघि

ब्याच नम्बर ६९ः नेपालका केही प्रभावशाली नेता 'हनी'सँगै 'मनी' ट्रयापमा परेका देखिन्छन्

हनी ट्रयापबारे लेख्दालेख्दै केही हप्ता ब्याच नम्बर ६९ रोकियो। रोकिनुको कारण पारवारिक दुःख। यो बीचमा मेरो मुमाको स्वर्गारोहण भयो। धार्मिक कर्म पूरा भएपछि पुनः ब्याच नम्बर ६९ लाई निरन्तरता दिँदैछु उही हनी ट्रयापको विषयबाटै।

नेता, सरकारी कर्मचारी लगायतलाई फसाएर काम लिन जासुसी संयन्त्र वा अन्य स्वार्थप्रेरित समूहले ट्रयापमा पार्ने गर्छन्।सरकारी संयन्त्रसँगै राजनीतिक तहका व्यक्तिहरू पनि हनी ट्रयापमा नपर्ने हैनन्। परेका छन्। यसमा जासुसी संयन्त्रले पनि ट्रयाप थाप्न सक्छन्। अथवा कुनै नेताको राजनीतिक करिअर धरासायी भए फाइदा हुन सक्ने समूहले पनि यस्तो ट्रयापको प्रयोग गरेको देखिन्छ नै।

राजनीतिक हनी ट्रयापबारे एक घटना उल्लेख गर्न मन लाग्यो। तर यो नेपालको हैन, भारतको हो।

भारतीय राष्ट्रिय कांग्रेसका नेता थिए नारायणदत्त तिवारी। उनी प्रधानमन्त्रीसम्म हुनसक्ने क्षमताका नेता। तर उनको कमजोरी युवती। त्यही कमजोरीको प्रयोग गरेर उनलाई हनी ट्रयापमा पारियो र राजनीतिक करिअर नै ध्वस्त बनाइयो।

त्यो ट्रयापै थियो।

सन् १९९१ मै उनको श्रीमतीको मृत्यु भएको थियो। त्यसपछिका दिनमा उनको नाम युवतीहरूसँग जोडिएर आइरहन्थ्यो। तर उनी निकै प्रभावशाली नेता।

उनी प्रधानमन्त्री हुने स्तरका थिए। आर्थिक सामाजिक विकासमा उनलाई अब्बल मानिन्थ्यो।

उत्तरप्रदेश अनि उत्तराखण्डको मुख्यमन्त्री भए उनी। उत्तरप्रदेशको त तीन पटक मुख्यमन्त्री भएका थिए। उनी राजीव गान्धीको मन्त्रिमण्डलमा विदेश मामिला मन्त्री र पछि अर्थमन्त्रीसमेत भएका थिए।

उनको राजनीतिक यात्रा तीव्र रूपमा अगाडि बढिरहेको थियो। धेरैले उनलाई भारतको भावी प्रधानमन्त्रीकै रूपमा हेर्ने गर्थे। तर सेक्स सक्यान्डलमा परिरहँदा उनको करिअरमा धक्का लागिरहेको थियो।

उनी सन् २००७ तिर आन्ध्र प्रदेशको राज्यपाल भए। उनका लागि यो नै सबैभन्दा ठूलो धक्का बन्यो। अनि उनको राजनीतिक यात्रा सक्कियो।

सन् २००९ तिर हैदराबादमा रहेको गभर्नरको निवास जसलाई 'राज भवन' भनिन्छ त्यहाँ तिवारी तीन जना युवतीसँग खाटमा आपत्तिजनक अवस्थामा रहेको भिडियो फुटेज सार्वजनिक भयो।

पहिला स्थानीय तेलगु च्यानलले फोटो सार्वजनिक गरेको थियो। पछि फुटेजहरू नै आए। त्यसपछि उनको तीव्र विरोध शुरु भयो। राजीनामै दिन बाध्य भए। यो काण्डले उनको राजनीतिक यात्रा नै सक्कियो।

यो हनी ट्रयापै थियो। त्यो बेलामा भारतीय जनता पार्टीलाई कांग्रेसविरुद्ध केही न केही हतियार चाहिएको थियो। त्यसमा तिवारीको व्यक्तिगत कमजोरी उपयोग गर्दै उनलाई ट्रयापमा पारियो।

सन् २००८ मा उज्जवला तिवारी नामकी महिलाले आफ्नो छोराको बाबु नारायणदत्त तिवारी भएको दाबी गर्दै अदालतमा मुद्दा हालेकी थिइन्। यसले पनि उनलाई अप्ठ्यारो पारेको थियो।

सन् २०१४ मा ती युवक र तिवारीको डीएनए परीक्षण गर्दा उनी तिवारीको जैविक सन्तान भएको पुष्टि भयो। अनि तिवारीले ८८ वर्षको उमेरमा आफ्नो जैविक सन्तानको आमासँग विवाह गरेका थिए।

नेपालमा पनि केही नेताहरू फसेका देखिन्छन्। मिडियामा समाचारको रूपमा सार्वजनिक हुन्छन्। तर त्यो त्यति गम्भीर रूपमा अगाडि बढेको छैन।

प्रधानमन्त्री तहका व्यक्ति गोप्य मिटिङमा हुँदा पनि कुनै महिला विषेशको फोन आउँदा उठाउने गरेकोसम्म सूचना आइरहन्थ्यो प्रहरीमा हुँदा।

माथिल्लो तहका नेताहरूको सम्बन्धबारे पनि सूचनाहरू आइरहन्थे। अलि बढी जोखिम बढ्न सक्ने देखिएको अवस्थामा निगरानीसम्म हुन सक्थ्यो। तर त्यसभन्दा अगाडि बढेको याद छैन।

सबैभन्दा गम्भीर केस देखिएको तत्कालीन सभामुख कृष्णबहादुर महराको हो। उनीमाथि पहिला बलात्कार आरोप लाग्यो। पछि बलात्कार प्रयासको आरोप लाग्यो।

पछि आरोप लगाउने युवती र महरा लामो समयदेखि सम्बन्धमा रहेको पनि देखियो। अदालतसम्म पुग्दा पीडित भनिएकी युवतीले बयानै बदलिइन्। महराले सफाइ पाए।

अब यसलाई ट्रयाप भन्ने या होस्टाइल भन्ने अलि अन्योल देखिन्छ। तर उच्च तहका व्यक्ति यौन काण्ड सार्वजनिक भएको त पहिलो घटना नै होला।

जासुसी ट्रयापबारे यस अगाडिको अंकमा पनि मैले लेखेको थिए। त्यो रसिनयबारे थियो। रसियनहरू हनी ट्रयापकोबारे बदनामै छन्। उनीहरूले यसको धेरै प्रयोग गरेका पनि छन्।

अब नेपालको हकमा हेर्ने हो भने अब भित्रभित्रै ट्रयापमा पारेर आफूअनुकूल काम गराएर गुपचुपै पारेको भए एउटा कुरा, नत्र नेपालमा रसियनहरूले त्यसरी उच्च तहका नेता वा कर्मचारीलाई हनी ट्रयापमा पारेको मेरो प्रहरी करिअरमा जानकारीमा आएन।

युरोपियन अनि अमेरिकीहरूले पनि ट्रयाप थाप्छन्। तर उनीहरूको ट्रयाप हनी हैन ‘मनी’ हुन्छ। आफूअनुकूल काम गराउन उनीहरू जति पनि पैसा खर्च गर्न राजी हुन्छन्। यसको प्रभाव नेपालको प्रशासन र राजनीतिक तहमा देखिएका पनि छन्।

नेपालमा पछिल्लो समय बढेको देखिएको हनी ट्रयाप राज्य संयन्त्रमै प्रभाव पार्ने तहको भन्दा पनि रकम असुल्ने तहसम्म मात्रै देखिन्छ। तर भोलिका दिनमा के हुन्छ भन्न सकिन्न।

ब्याचका पुराना अंक

१- गोपालजिजंग शाहको प्रश्नले पुर्यायो प्रहरीमा

२- ..अनि भाग्ने योजना बनाएँ

३- दर्ज्यानी चिह्न लगाउँदा झण्डै बेहोस

४- बराल सरको संगतले अनुसन्धानको सीप सिकें

५- क्या विश्वास थियो प्रहरीको !

६- चिच्याउँदै प्रहरीहरू हाँडीगाउँतिर भाग्न थाले

७- उनको त्यो तस्बिर

८- पहिलो बढुवामै छुटेपछि मेरो दृष्टिकोणै बदलियो

९- सुन लिएर हवल्दार भागेपछि…

११- आफ्नै स्टाफले मेरो जासुसी गरे

१२- खरेलले भने- सर तपाईं त अर्कै खालको हुनुहुँदोरहेछ