अछाममा जीपको ब्रेक फेल हुँदा चार जना घाइते

अछाम : अछामको रिडिकोटमा जीप दुर्घटना हुँदा चार जना घाइते भएका छन्। लु १ ज ४७११ नम्बरको जीपको ब्रेक फेल हुँदा बाजुराका चार जना घाइते भएका हुन्।

बयलपाटाबाट बाजुरा जाँदै गरेको जीप रिडिकोटस्थित मध्यपहाडी लोकमार्गको नालीमा पल्टिदा बाजुराको त्रिवेणी नगरपालिका-६ बस्ने १९ वर्षीया नन्दा बुढा, बुढीगङ्गा नगरपालिका-४ बस्ने २७ वर्षीय राजेन्द्र लुहार र उनका छोरा छ वर्षीय सक्षम लुहार तथा बाजुराकै खप्तड छेडेदह गाउँपालिका-३ का गाडी चालक २३ वर्षीय रोहित रावत घाइते भएका जिल्ला प्रहरी कार्यालय अछामका प्रमुख डिएसपी ईश्वरीप्रसाद भण्डारीले बताए। 

घाइतेमध्ये नन्दा बुढाको टाउको र मुखमा गम्भीर चोट लागेको छ भने अन्य सबैको अवस्था सामान्य छ। घाइतेको अछामस्थित न्याय हेल्थ बयलपाटामा उपचार भइरहेको छ।

गाडी चालक प्रहरीको नियन्त्रणमा छन्।  

कात्तिक १४, २०८१ बिहीबार १९:२५:२९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।