साफ महिला च्याम्पियनसिपको तयारी अन्तिम चरणमा, साधारण टिकट तीनसय रूपैयाँ
काठमाडौं : अखिल नेपाल फुटबल संघ (एन्फा) ले अक्टोबर १७ (बिहीवार) देखि ३० सम्म दशरथ रंगशालामा साफ महिला च्याम्पियनसिप २०२४ आयोजना गर्ने भएको छ।
मंगलबार काठमाडौंमा पत्रकार सम्मेलनको आयोजना गर्दै दक्षिण एसियाली फुटबल महासंघ (साफ) को तालिका अनुसार एन्फाले च्याम्पियनसिप आयोजना गर्न लागेको जानकारी दिएका हो।
प्रतियोगितामा नेपाललगायत माल्दिभ्स, पाकिस्तान, श्रीलंका, भारत, भुटान र बंगलादेश गरि सात टीमले सहभागिता जनाउँदै छन्।
सहभागी टोलीहरू मध्ये पाकिस्तान, माल्दिभ्स र बंगलादेश आइसकेका छन् भने भारत र भुटान बुधबार बिहानसम्म काठमाडौं आइपुग्ने जानकारी गराइएको छ।
प्रतियोगिताको तयारीका लागि २३ सदस्यीय नेपाली राष्ट्रिय महिला टोली मुख्य प्रशिक्षक राजेन्द्र तामाङको नेतृत्वमा बन्द प्रशिक्षणमा रहेको छ।
प्रतियोगितामा सहभागी टोलीलाई एन्फा कम्प्लेक्सको खेल मैदान, नेपाली सेनाको भद्रकाली र लगनखेल खेल मैदान र सेन्ट.जेभियर्स स्कूलको खेल मैदानमा प्रशिक्षण गर्ने व्यवस्था गरिएको छ।
प्रतियोगिताको टेलिभिजन प्रसारण, मार्केटिङ र डिजिटल अधिकार एडी रिलिजलाई प्रदान गरिसकिएको छ।
प्रतियोगिताका सम्पूर्ण खेलहरू कान्तिपुर म्याक्स एच्डीबाट प्रत्यक्ष प्रशारण गरिनेछ। प्रतियोगिताको टिकटको अधिकार माउन्ट एभरेष्ट स्पोर्ट्स एण्ड इभेन्ट्स प्रालिलाई प्रदान गरिएको छ।
प्रतियोगिताको समूह चरणका खेलको टिकट दर साधारण पारापिट तर्फ तीनसय रुपैयाँ र भीआइपी तर्फ पाँचसय रुपैयाँ तोकिएको छ।
नकआउट चरणका खेलहरूको टिकट दर साधारण पारापिटतर्फ पाँचसय रुपैयाँ, भीआईपीतर्फ एक हजार रुपैयाँ कायम गरिएको छ। प्रतियोगितामा १० बर्षसम्मका सबै बालबालिकालाई निःशुल्क प्रवेश दिइनेछ।
प्रतियोगिता अवधिभर दर्शकहरुको सुविधाको लागि रंगशाला परिसरभित्रै खाजाको व्यवस्था पनि गरिएको छ। यसका लागि शिवांश फुड एण्ड बेभरेज प्रालिसँग सम्झौता गरिएको छ।
असोज २८, २०८१ मंगलबार १७:५८:२९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
