बेलायती प्रधानमन्त्रीलाई सगरमाथा आधार शिविर आउन मनिषा कोइरालाको निम्तो

काठमाडौं : वेलायत भ्रमणमा रहेकी अभिनेत्री मनिषा कोइरालाले बेलायती प्रधानमन्त्री ऋषि सुनकलाई सगरमाथाको आधार शिविर भ्रमणका लागि निमन्त्रणा दिएको बताएकी छिन्।

नेपाल र बेलायतबीच मैत्रीपूर्ण सम्बन्धको एक सय वर्षगाँठ मनाउन प्रधानमन्त्री कार्यालय टेन डाउनिङ स्ट्रिटमा सुनकले आयोजना गरेको समारोहमा उपस्थित भएकी मनिषाले सगरमाथा आधार शिविर जानेगरी नेपाल आउन निम्ता दिएको सामाजिक संजालमार्फत जनाएकी छिन्।

प्रधानमन्त्री सुनक र मनिषाबीच क्याजुअल रुपमा गफगाफ गरिरहेको तस्वीर पोष्ट गरेकी उनले सगरमाथा आधार शिविरमा पदयात्राका लागि निम्तो गरेको उल्लेख गरेकी छन्।

मनिषा स्वयमले इन्स्टाग्रामबाट सुनकसँगको भेटका तस्वीर र भेटमा भएको गफगाफ बारेका कुरा पोस्ट गरेकी छन्। प्रधानमन्त्री सुनकले नेपालबारे सुन्न पाउँदा आफूलाई खुसी लागेको उनको भनाई छ। 

‘हीरामण्डी’ सिरिजको कार्यक्रममा लन्डन पुगेकी उनले आयोजित समारोहमा थुप्रै नेपालीहरूसँग भेटेकी थिइन्।

समारोहमा नेपाली राजदूत ज्ञानचन्द्र आचार्यदेखि बेलायतस्थित नेपाली समूदायको बाक्लो उपस्थिति थियो। समारोहमा सुनकले नेपाल र बेलायतबीचको ऐतिहासिक सम्बन्धको विभिन्न आयामहरूको बारेमा बोल्दै द्विपक्षीय सम्बन्धमा ब्रिटिश गोर्खाहरुको योगदानको प्रशंसा गरेका थिए।

बेलायती राजा चार्ल्सको विगतको नेपाल भ्रमणको स्मरण गर्दै उनले विभिन्न क्षेत्रमा ख्यातिप्राप्त बेलायतमा रहेका नेपाली डायस्पोराको काम र उपलब्धिबाट आफू प्रेरित भएको बताएका थिए। 

जेठ १०, २०८१ बिहीबार १३:३७:३६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।