तोडफोडपछि नेपाल मेडिकल कलेजको ओपीडी बन्द, दोषीलाई काराबाही गर्न चिकित्सक संघको माग

काठमाडौं : जोरपाटीस्थित नेपाल मेडिकल कलेजमा तोडफोडको विरोधमा ओपीडी सेवा बन्द भएको छ। 

अस्पताल प्रशासनले अस्पताल तोडफोड गर्नुका साथै चिकित्सक तथा स्वास्थ्यकर्मीहरूलाई अभद्र व्यवहार भएको भन्दै त्यसको विरोधस्वरुप ओपीडी सेवा बन्द गरेको सूचनामार्फत जनाएको छ।

गत जेठ २७ गते कलेजमा उपचाररत बिरामीको सर्जरी गरी उपचार हुँदै गर्दा अकस्मात् हाइपोसिक इस्केमिक इन्सोफालोपाथी भई आईसीयूमा उपचार भइरहेको छ।

यो घटनालाई लिएर जेठ ३० गते बिरामीका आफन्तहरूले अस्पतालमा तोडफोड गर्ने, चिकित्सक तथा स्वास्थ्यकर्मीहरूलाई गालीगलौज गरी अभद्र व्यवहार गरिएको अस्पतालद्वारा जारी सूचनामा भनिएको छ।

यस्तै यसै विषयमा नेपाल चिकित्सक संघले पनि अस्पताल तोडफोडमा संलग्लाई कारबाहीको माग गरेको छ।

संघका महासचिव डा.सञ्जीव तिवारीले वुधबार विज्ञप्ति जारी गर्दै भनेका छन्, ‘उपचाररत बिरामीको गाम्भीर्यतालाई नबुझी अस्वाभाविक रूपमा उत्तेजनामा आई अस्पतालमा तोडफोड गर्ने, अस्पतालको शान्तिपूर्ण वातावरणलाई खलल पुर्याई बिरामीहरूको उपचारमा खटिने चिकित्सक, तथा स्वास्थ्यकर्मी लगायतलाई मानसिक तनाव सिर्जना गरिनु गैरमानवीय कार्य हो।’

उपचार प्रक्रियामा चित्त नबुझेको अवस्थामा कानुनी बाटो अवलम्बन गर्ने प्रावधान हुँदा हुँदै पनि अस्पताल नै तोडफोड गर्ने जस्तो आपराधिक गतिविधिमा संलग्न हुनु अत्यन्तै दुःखद कार्य भएको उनको भनाई छ।  

संघले स्वास्थ्य जस्तो संवेदनशील क्षेत्रमा यस प्रकारको अमानवीय घटना घटाई समग्र स्वास्थ्यकर्मी तथा चिकित्सकहरूको मनोबललाई नै निरुत्साहित पार्ने कार्यमा संलग्न दोषीमाथि छानबिन गरी ‘स्वास्थ्यकर्मी तथा स्वास्थ्य संस्थाको सुरक्षा सम्बन्धी (पहिलो) संशोधन ऐन २०७९’ बमोजिम कानुनी कारबाही गर्न नेपाल सरकार तथा स्थानीय सुरक्षा निकाय समक्ष माग गरेको छ।

जेठ ३१, २०८० बुधबार १३:३७:०३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।