घाँटी रेटिएको अवस्थामा भेटिए शाही : डिप्रेसनको औषधि खान्थे, विदेश जाने तयारीमा थिए
सुर्खेत : वीरेन्द्रनगर–१० बुदबुदी टोलस्थित बारीमा मंगलबार सुर्खेतमा एक पुरूषको शव स्थानीयले देखे।
स्थानीयले प्रहरीलाई खबर गरे। घटनास्थल पुगेको सुर्खेत प्रहरीले घाँटी रेटिएको अवस्थामा शव देखेपछि घटनास्थलको मुचुल्का तयार गरि आवश्यक अनुसन्धानका लागि कोहलपुरबाट कुकुरसहितको अनुसन्धान टोली बोलायो।
दिउँसो भेटिएको शवको पहिचान बेलुका मात्र भयो। मृत फेला परेका पुरूष वीरेन्द्रनगर नगरपालिका–१० दीपनगर टोलका ४१ वर्षीय ध्रुव शाही रहेछन्।
शाहीको शव घाँटीको अघिल्लो भागमा धारिलो हतियारले काटिएको थियो। शव नजिनै चक्कु पनि फेला पर्यो।
जिल्ला प्रहरी कार्यालय सुर्खेतका प्रवक्ता डिएसपी लक्ष्मण शाहीका अनुसार मृत भेटिएका शाही मंगलबार बिहान १० बजेमात्र खजुरामा रहेको दिदीको घरमा जान भनेर निस्किएका थिए।
‘बिहान १० बजेतिर आफ्नो घरबाट निस्किएर दिदीको घरमा गएका रहेछन्, दिदीको घरबाट भने साढे ११ बजे निस्किएका थिए, भन्ने कुरा हामीले परिवारसँग बुझ्यौं,’ डिएसपी शाहीले भने, ‘शव भेटिएको वरिपरि बस्ती छ, नजिकै चक्कु पनि भेटिएकाले झट्ट हेर्दा हत्याजस्तो नदेखिए पनि थप कुरा अनुसन्धानबाटै खुल्नेछ।’
घटनापछि प्रहरीले मृतकका परिवारसँग गरेको सोधपुछमा उनमा मानसिक तनाव भइरहने र डिप्रेसनको औषधि खाने गरेको खुलेको छ। शाही र उनकी श्रीमती मंगलबार बिहान खाना खानुअघि औषधि लिन वीरेन्द्रनगर बजारमा रहेको माया नर्सिङ होममा गएको परिवारलाई उद्धृत गर्दै प्रहरीले जनाएको छ।
अस्पतालबाट फर्किएपछि खाना खाएर शाही दिदीको घर जान भनेर हिँडेका थिए। दिदीको घरबाट निस्किएको समय साढे ११ बजेदेखि शव भेटिँदासम्मको समय उनले कहाँ बिताए भन्ने बारेमा भने खोजी भइरहेको डिएसपी शाहीको भनाइ छ।
मृत भेटिएका शाही सुरूमा नेपाली सेनामा कार्यरत थिए। उनले १३ वर्ष जागिर गरेर छोडेका थिए। त्यसपछि उनी वैदेशिक रोजगारीका लागि कतार गएका थिए।
कतारबाट फर्किएपछि गाडी किनेर चलाएका उनले तीन महिनामै गाडी बेचेको प्रहरीले जनाएको छ। त्यसयता अहिले पुनः वैदेशिक रोजगारीका लागि जाने योजना बनाइरहेका थिए।
शाहीका एक छोरा र एक छोरी छन्। शाहीको शव पोष्टमार्टमका लागि कर्णाली प्रदेश अस्पतालमा राखिएको छ।
चैत १, २०७९ बुधबार १४:२३:१८ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
