कोशी, बागमती र गण्डकी प्रदेशमा वर्षा र हिमपातको सम्भावना

काठमाडौं : हाल नेपालको उपल्लो वायुमण्डलमा पश्चिमी न्यून चापीय प्रणालीको आंशिक प्रभाव रहेको छ।

अहिले कोशी, बागमती र गण्डकी प्रदेशका पहाडी तथा हिमाली भूभागमा सामान्य बदली (बादल लागेको) छ भने बाँकी पहाडी तथा हिमाली भूभागमा आंशिक बदली रहेको छ।

कोशी र बागमती प्रदेशका पहाडी तथा हिमाली भूभागका एक-दुई स्थानमा मेघगर्जन र चट्याङ्गसहित हल्का वर्षा र हिमपात भइरहेको छ।

आज दिउँसो कोशी, बागमती र गण्डकी प्रदेशका हिमाली तथा पहाडी भूभागमा सामान्य बदली रहनेछ भने बाँकी हिमाली तथा पहाडी भूभागमा आंशिक बदली रहनेछ।

यी तीन प्रदेशका पहाडी र हिमाली भूभागका थोरै स्थान तथा बाँकी प्रदेशका पहाडी र हिमाली भूभागका एक-दुई स्थानमा मेघगर्जन र चट्याङ्गसहित हल्का वर्षा र हिमपातको सम्भावना छ।

तराईका केही भूभागमा बिहानको समयमा हुस्सु लागे पनि दिउँसो मौसम मुख्यतया सफा रहनेछ।

यस्तै, आज राति देशका हिमाली भूभागमा सामान्य बदली र पहाडी भूभागमा आंशिक बदली रहनेछ।

कोशी, गण्डकी र कर्णाली प्रदेशका हिमाली भूभागका एक-दुई स्थानमा मेघगर्जन र चट्याङ्गसहित हल्का वर्षा र हिमपातको सम्भावना रहेको छ। तराई भूभागमा मौसम मुख्यतया सफा रहे पनि थोरै स्थानहरूमा तुवाँलो लाग्नेछ।