बागलुङमा 'ट्रयाक' खुलेको २६ वर्षपछि सडक कालोपत्र

बागलुङ : ‘ट्रयाक’ खुलेको २६ वर्षपछि मूलपानी–तितौरे, ओडारचौर–ढोडेनी र गणेशघुम्ती–निरयघाट सडक कालोपत्र भएको छ। जिल्ला सदरमुकामसँग जोडिएको सडक कालोपत्र भएपछि स्थानीय खुसी भएका छन्।

सडक कालोपत्र भएपछि यात्रा र सामान ढुवानी गर्न सहज भएको छ।

सहरी शासकीय तथा पूर्वाधार विकास कार्यक्रममार्फत मूलपानी–तितौरे सडकको ८.५ किलोमिटर, ओडारचौर–ढोडेनीसम्मको २.५ किमी र गणेशघुम्ती–निरयघाटअन्तर्गत १.५ किमी गरी १२.२ किमी सडक कालोपत्र गरिएको छ।

विश्व बैंकको ४८ करोड अनुदानमा सडक निर्माण गरेको बागलुङ नगरपालिकाका प्रमुख वसन्तकुमार श्रेष्ठले जानकारी दिए। सडकले ग्रामीण जनतालाई यात्रा गर्न र स्थानीय उत्पादनको बजारीकरण गर्न सहज भएको उनको भनाइ छ।

बागलुङ नगरपालिकाका तीनवटा वडामा पर्ने उक्त सडकले नागरिकको जीवनस्तरमा परिवर्तन ल्याउने प्रमुख श्रेष्ठले बताए। 

उनले भने, “ट्रयाक खुलेको धेरै समय भएको थियो, तर अहिलेसम्म कालोपत्र नहुँदा गाउँमा धुलोले स्थानीय आजित थिए, यात्रा र सामान ढुवानीमा पनि उस्तै समस्या थियो, अब कालोपत्र सडकले उनीहरूको यात्रामात्र होइन दैनिकी नै सहज बनाउने अपेक्षा लिएका छौँ।”

सडक कालोपत्र भएपछि बागलुङ नगरपालिका–१, ४ र ७ नम्बर वडाका स्थानीय धुलो र हिलोबाट मुक्त भएका छन्।

केही महिना अगाडिसम्म घर अगाडि गाडी गुड्दा धुलो र हिलो भान्छा कोठामै पुग्ने गरेको भन्दै अहिले कालोपत्र गरेको चिटिक्क बनेको स्थानीय तुलसी सापकोटाले बताए।

अर्का स्थानीय प्रेम विकले पहिले बजार पुग्न करिब साढे एक घण्टा लाग्ने गरेकोमा अब २५–३० मिनेटमै बागलुङ बजार पुग्न सकिने बताए।