खालिस्तान समर्थक पन्नूको हत्या षड्यन्त्र स्वीकारेका भारतीय नागरिकलाई अमेरिकामा २४ वर्षको जेल सजाय

एजेन्सी : अमेरिकामा खालिस्तान समर्थक गुरपतवन्त सिंह पन्नूको हत्याको षड्यन्त्र रचेको आरोपमा भारतीय नागरिक निखिल गुप्तालाई २४ वर्षको जेल सजाय सुनाइएको छ।

भारतीय समाचार संस्था एएनआईका अनुसार, निखिलले शुक्रबार न्यूयोर्कको अदालतमा आफ्नो अपराध स्वीकार गरेका छन्।

अदालतले सजायको औपचारिक घोषणा भने आगामी मे २९ मा गर्नेछ। अमेरिकी जाँच एजेन्सी एफबीआईले निखिल गुप्ताले अपराध स्वीकार गरेको जानकारी दिएको छ।

एफबीआईका अनुसार यो षड्यन्त्र एक अमेरिकी नागरिक (पन्नू) को हत्याका लागि रचिएको थियो, जसलाई अमेरिकी सुरक्षा एजेन्सीहरूले समयमै असफल पारिदिएका थिए।

अमेरिकी महान्यायाधिवक्ताको कार्यालयका अनुसार, निखिल गुप्ता उर्फ ‘निक’ ले भाडाका हत्यारा प्रयोग गरेर हत्या गर्ने र सम्पत्ति शुद्धीकरणको षड्यन्त्र गरेको स्वीकार गरेका छन्।

अमेरिकी एजेन्सीहरूका अनुसार, यो योजनामा भारतका एक पूर्व कर्मचारी विकास यादवको पनि संलग्नता रहेको दाबी गरिएको छ। यादवले नै निखिल गुप्तालाई पन्नूको हत्याका लागि ‘सुपारी किलर’को व्यवस्था गर्न निर्देशन दिएका थिए।

निखिलले पन्नूलाई मार्नका लागि एक व्यक्तिलाई सम्पर्क गरेका थिए, तर ती व्यक्ति वास्तवमा अमेरिकी सरकारका ‘अन्डरकभर एजेन्ट’ थिए। निखिलले हत्याका लागि १ लाख डलरको सम्झौता गरेका थिए, जसमध्ये १५ हजार डलर अग्रिम भुक्तानी गरिएको थियो।

पन्नूको हत्याको षड्यन्त्र रचेको आरोपमा निखिल गुप्तालाई ३० जुन २०२३ मा चेक रिपब्लिकबाट पक्राउ गरिएको थियो। त्यसपछि १४ जुन २०२४ मा उनलाई अमेरिका सुपुर्दगी गरियो। सुरुमा उनले आफूलाई निर्दोष बताए पनि अहिले अपराध स्वीकार गरेका छन्।

गुरपतवन्त सिंह पन्नू मूल रूपमा भारतको पञ्जाबका बासिन्दा हुन् र हाल उनीसँग अमेरिका र क्यानडाको नागरिकता छ। उनी ‘सिख्स फर जस्टिस’ नामक संगठन चलाउँछन् र स्वतन्त्र खालिस्तानको वकालत गर्छन्।

पन्नूले अन्तर्राष्ट्रिय मञ्चमा सिख समुदायका लागि छुट्टै देशको माग गर्दै आएका छन्। यद्यपि, भारत सरकारले उनलाई सन् २०२० मा गैरकानुनी गतिविधि रोकथाम ऐनअन्तर्गत आतंकवादी घोषित गरेको थियो। भारतले उनीमाथि विखण्डनवादलाई बढावा दिएको आरोप लगाउँदै आएको छ।

अमेरिकी अनुसन्धानमा ‘सीसी-१’ भनिएका व्यक्ति विकास यादव हुन्, जो भारतीय गुप्तचर संस्था ‘रअ’सँग आबद्ध रहेको एफबीआईको दाबी छ। विकास यादवको तस्बिरसहित एफबीआईले उनलाई ‘वान्टेड’ सूचीमा राखेको छ।

यद्यपि, भारतीय विदेश मन्त्रालयले गत अक्टोबरमा प्रतिक्रिया दिँदै अमेरिकी आरोपपत्रमा नाम आएका व्यक्ति हाल भारत सरकारको सेवामा नरहेको स्पष्ट पारेको थियो।

विकास यादवलाई यसअघि दिल्ली पुलिसले अपहरण र हत्या प्रयासको अर्कै मुद्दामा पक्राउ गरेको थियो, जसमा उनले अप्रिल २०२४ मा जमानत पाएका थिए।