बंगलादेशमा बीएनपीको ऐतिहासिक पुनरागमन, दुई दशकपछि सत्ताको बागडोर सम्हाल्दै तारिक रहमान

एजेन्सी : बंगलादेशमा करिब दुई दशक लामो प्रतीक्षापछि बंगलादेश नेसनलिस्ट पार्टी (बीएनपी) भारी बहुमतका साथ सत्तामा फर्किएको छ।

१३औं आम निर्वाचनको प्रारम्भिक र अनौपचारिक नतिजा अनुसार तारिक रहमान नेतृत्वको बीएनपीले संसदमा स्पष्ट बहुमत हासिल गरेको छ।

सन् २०२४ को विद्यार्थी नेतृत्वको जनविद्रोहले शेख हसिनाको शासन अन्त्य गरेपछिको यो पहिलो ऐतिहासिक निर्वाचन हो। बंगलादेश निर्वाचन आयोगका अनुसार २९९ निर्वाचन क्षेत्रमा भएको मतदानको मतगणना अन्तिम चरणमा पुगेको छ।

पछिल्लो विवरण अनुसार २९९ सिटमध्ये २०९ भन्दा बढी सिट जित्दै बीएनपीले दुई-तिहाइ नजिकको बहुमत प्राप्त गरेको छ। यसअघि बीएनपीसँगै आन्दोलनमा रहेको जमात-ए-इस्लामीले करिब ६० सिट जितेर दोस्रो ठूलो शक्ति बनेको छ।

राष्ट्रिय नागरिक पार्टी र स्वतन्त्र उम्मेदवारहरूले बाँकी सिटहरूमा विजय हासिल गरेका छन्। शेख हसिनाको दल अवामी लिगलाई निर्वाचनमा सहभागी हुन प्रतिबन्ध लगाइएका कारण यो प्रतिस्पर्धा मुख्यतया बीएनपी र जमात-ए-इस्लामी बीच देखिएको थियो।

यसपटक संसदीय निर्वाचनसँगै बंगलादेशमा अर्को ऐतिहासिक प्रक्रिया पनि सम्पन्न भयो। सन् २०२४ को विद्रोहको भावना समेटिएको ‘जुलाई राष्ट्रिय बडापत्र’लाई अनुमोदन गर्न राष्ट्रिय जनमत संग्रह गरिएको थियो।

प्रारम्भिक तथ्याङ्क अनुसार करिब ७३ प्रतिशत मतदाताले संवैधानिक सुधारको पक्षमा ‘हो’मा मतदान गरेका छन्। यसले बंगलादेशको राजनीतिक संरचनामा आमूल परिवर्तन ल्याउने अपेक्षा गरिएको छ।

बीएनपीका कार्यवाहक अध्यक्ष तारिक रहमान १७ वर्षको निर्वासनपछि गत डिसेम्बर २०२५ मा लण्डनबाट बंगलादेश फर्किएका थिए। आफ्नी आमा तथा पूर्व प्रधानमन्त्री बेगम खालिदा जियाको निधनको केही समयपछि उनले पार्टीको कमान सम्हालेका थिए।

निर्वाचनमा विजय सुनिश्चित भएपछि उनले आफ्ना समर्थकहरूलाई संयमित रहन र कुनै पनि विजय जुलुस वा उत्सव नमनाउन निर्देशन दिएका छन्। उनले यस विजयलाई ‘जनताको वास्तविक स्वतन्त्रता’को संज्ञा दिएका छन्।

निर्वाचन आयोगका अनुसार देशभरि करिब ६१ प्रतिशत मत खसेको छ। निर्वाचनलाई शान्तिपूर्ण बनाउन सेना, पुलिस र बोर्डर गार्ड बंगलादेशका १० लाखभन्दा बढी सुरक्षाकर्मी परिचालन गरिएको थियो।

केही ठाउँमा फाट्टफुट्ट झडप र ७० भन्दा बढी घाइते भएका विवरण आए तापनि विगतका निर्वाचनको तुलनामा यसपटकको मतदान निकै व्यवस्थित र मर्यादित रहेको पर्यवेक्षकहरूले बताएका छन्।

बीएनपीको जितसँगै छिमेकी मुलुक भारतका प्रधानमन्त्री नरेन्द्र मोदीले तारिक रहमानलाई बधाई दिँदै एक ‘लोकतान्त्रिक, प्रगतिशील र समावेशी बंगलादेश’ निर्माणमा भारतको पूर्ण सहयोग रहने प्रतिबद्धता व्यक्त गरेका छन्।

त्यस्तै, संयुक्त राज्य अमेरिका र युरोपेली युनियनले पनि बंगलादेशमा लोकतन्त्रको पुनर्स्थापना भएको भन्दै खुशी व्यक्त गरेका छन्।