यसपटक पनि काभ्रेमा छैनन् दलित उम्मेदवार
काभ्रेपलाञ्चोक : आगामी फागुन २१ मा हुने प्रतिनिधिसभा सदस्य निर्वाचनमा काभ्रेको क्षेत्र नं १ मा राजनीतिक दलका र स्वतन्त्र नयाँ उम्मेदवार बिच प्रतिस्पर्धा हुने देखिएको छ।
यो क्षेत्रमा १५ दल र तीन स्वतन्त्र उम्मेदवार चुनावी मैदानमा उत्रिएका छन्।
यस निर्वाचन क्षेत्रमा विशेषगरी ठूला दल नेपाली कांग्रेस, एमाले, राष्ट्रिय स्वतन्त्र पार्टी (रास्वपा) र नेपाली कम्युनिस्ट पार्टी (नेकपा)का उम्मेदवारबीच कडा प्रतिस्पर्धा हुने आकलन गरिएको छ।
यस क्षेत्रमा एमालेका अमित लामा, कांग्रेसका गुणराज मोक्तान, रास्वपाबाट मधुकुमार चौलागाईं र नेकपाका दिननाथ गौतमले उम्मेदवारी दिएको जिल्लास्थित मुख्य निर्वाचन कार्यालयले जनाएको छ।
यस क्षेत्रमा गत प्रतिनिधिसभा निर्वाचन-२०७९ मा एमालेका केन्द्रीय सदस्य रेशम लामालाई तीन हजार ९६४ मतले पछि पार्दै तत्कालीन माओवादी केन्द्रका सूर्यमान दोङ ३४ हजार ४१२ मत प्राप्त गरी विजयी भएका थिए।
एमालेका उम्मेदवार लामा पार्टीका केन्द्रीय सदस्य हुन, भने कांग्रेसका उम्मेदवार मोक्तान पार्टीको जिल्ला सचिव हुन। यस्तै रास्वपाका चौलागाइँ कानुन व्यवसायी तथा नेकपाका उम्मेदवार गौतम चौंँरीदेउराली गाउँपालिकाका पूर्व अध्यक्ष हुन्।
ठूला दलका यी उम्मेदवार पनि प्रतिनिधिसभा निर्वाचनका लागि नयाँ अनुहार हुन्। यस क्षेत्रमा ‘अन्य’ समूहबाट एकजना प्रतिस्पर्धामा उत्रिएका छन्।
गत प्रतिनिधिसभा निर्वाचन–२०७९ मा यहाँको क्षेत्र नं १ मा समानुपातिकतर्फ एमाले २४ हजार ७९, कांग्रेस २१ हजार ७५५, तत्कालीन माओवादी केन्द्र १७ हजार ३३५, रास्वपा नौ हजार ७९४, राप्रपा दुई हजार ४२९ र तत्कालीन एकीकृत समाजवादीले एक हजार नाै सय ५५ मत प्राप्त गरेका थिए।
आसन्न निर्वाचनमा काभ्रेका दुई निर्वाचन क्षेत्रमा उम्मेदवारी दर्ता गराएका ४२ उम्मेदवारकै उम्मेदवारी कायम भएको छ। क्षेत्र नं १ मा १८ र क्षेत्र नं २ मा २४ जनाले उम्मेदवारी दर्ता गरेका हुन्।
यसपटक पनि काभ्रेमा दलित उम्मेदवार निर्वाचनको प्रतिस्पर्धामा छैनन्।
यस्तै जनजाति तर्फबाट २५ जना उम्मेदवारी परेको जनाइएको छ। यस्तै निर्वाचन क्षेत्र नं २ मा भने १६ दल, आठ स्वतन्त्र गरी २४ जनाको उम्मेदवारी दर्ता भएको छ।
काभ्रेमा तीन लाख २६ हजार छ सय ११ मतदाता छन्। यसमध्ये एक लाख ६७ हजार चार सय ९९ पुरुष र ५९ हजार एक सय १० महिला र दुई जना अन्य रहेका हुन्।
निर्वाचन कार्यालयका अनुसार क्षेत्र नं १ मा एक लाख ६१ हजार एक सय र क्षेत्र नं २ मा एक लाख ६५ हजार पाँच सय ११ मतदाता रहेका छन्।
माघ २६, २०८२ सोमबार १२:१६:२४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
