जग्गा प्रकरणमा पूर्वप्रधानमन्त्री हसिना दोषी ठहर, १० वर्षको कैद सजाय

काठमाडौं : भ्रष्टाचार र अख्तियार दुरुपयोगको मुद्दामा बंगलादेशकी पूर्वप्रधानमन्त्री शेख हसिनालाई ढाकाको विशेष अदालतले १० वर्षको जेल सजाय तोकेको छ। राजधानी ढाकास्थित पूर्वाचल न्यु टाउन परियोजना अन्तर्गतको २० कट्ठा जग्गा हिनामिना गरेको अभियोगमा उनीसहित परिवारका अन्य सदस्यहरूलाई समेत दोषी ठहर गर्यो।

ढाका विशेष न्यायाधीश अदालत-४ का न्यायाधीश रोबिउल आलमले सोमबार दुई फरक-फरक मुद्दामा प्रत्येकमा पाँच-पाँच वर्षको सजाय सुनाउँदै कुल १० वर्षको कैद तोके। उही मुद्दामा शेख हसिनाकी बहिनी शेख रेहानाकी छोरी तथा बेलायती सांसद टुलिप रिजवाना सिद्दिकलाई प्रत्येक मुद्दामा दुई-दुई वर्ष गरी कुल चार वर्षको जेल सजाय सुनायो।

त्यस्तै, अजमिना सिद्दिकलाई एक मुद्दामा सात वर्षको कैद सजाय तोक्यो भने शेख हसिनाका छोरा रदवान मुजिब सिद्दिक (बोबी) लाई पनि सात वर्षको जेल सजाय सुनायो। टुलिप सिद्दिक शेख हसिनाकी भतिजी तथा पूर्व बेलायती मन्त्रीसमेत हुन्। 

अदालतले यस मुद्दामा ३१ जना साक्षीको बयान लिएको थियो। भ्रष्टाचार निवारण आयोग (एसीसी) का सहायक निर्देशक अफनान जन्नत कियाले अन्तिम अभियोजन साक्षीका रूपमा बयान दिएका थिए।

भ्रष्टाचार निवारण आयोगले जनवरी १३, २०२५ मा १६ जनाविरुद्ध मुद्दा दायर गरेको थियो भने अनुसन्धानपछि मार्च १०, २०२५ मा १८ जनाविरुद्ध अभियोग पत्र दायर गरिएको थियो। अदालतले जुलाई ३१, २०२५ मा अभियोग निर्धारण गर्दै सुनुवाइ सुरु गरेको थियो।

यसैबीच, पूर्वाचल परियोजनाअन्तर्गत १० कट्ठा जग्गा प्राप्त गर्न अधिकार दुरुपयोग र अनियमितता गरेको आरोपमा दायर गरिएको अर्को मुद्दामा पनि यही अदालतले शेख हसिना, उनका भतिजा रदवान मुजिब सिद्दिक तथा उनकी बहिनी टुलिप सिद्दिकसहित १८ जनाविरुद्ध फागुन २ गते फैसला सुनायो। 

बंगलादेशमा सन् २०२४ जुलाईमा विद्यार्थी नेतृत्वमा भएको आन्दोलनपछि अगस्ट ५ मा शेख हसिनाले भारतमा शरण लिएकी थिइन्। त्यसपछि नोबेल पुरस्कार विजेता मोहम्मद युनुसको नेतृत्वमा अन्तरिम सरकार गठन भई शेख हसिना, उनका मन्त्रिपरिषद् सदस्य तथा अवामी लिगका नेताकार्यकर्ताविरुद्ध कानुनी प्रक्रिया अघि बढाइएको छ।