‘निर्वाचन प्रहरी’मा भर्ना हुन प्रहरी परिसरमा युवाको भिड, सडकसम्मै लाइन (फोटो फिचर)

काठमाडौं : आगामी फागुन २१ गते हुने प्रतिनिधिसभा सदस्य निर्वाचनका लागि सुरक्षा व्यवस्था सुदृढ बनाउन सरकारले निर्वाचन प्रहरी (म्यादी प्रहरी)को भर्ना प्रक्रिया सुरु गरेको छ। 

शुक्रबारदेखि देशभरका जिल्ला प्रहरी कार्यालय र काठमाडौं उपत्यकाका तीन प्रहरी परिसरमार्फत आवेदन सङ्कलन सुरु गरेसँगै प्रहरी कार्यालयमा आवेदन दिने युवाहरूको बाक्लो उपस्थिति देखिएको छ।

प्रहरी प्रधान कार्यालयका अनुसार यस पटक देशभर कुल १ लाख ३३ हजार ९८० जना म्यादी प्रहरी भर्ना गरिने छ। प्रहरीका अनुसार म्यादी प्रहरीमा सहभागी हुन इच्छुक युवाहरूले पुस २५ गतेदेखि माघ १ गतेसम्म आवेदन दिन सक्नेछन्। दरखास्त फाराम बिहान १० बजेदेखि बेलुका ५ बजेसम्म सम्बन्धित जिल्ला प्रहरी कार्यालयहरूमा बुझाउन सकिनेछ।

निर्वाचनलाई स्वच्छ, निष्पक्ष र भयरहित वातावरणमा सम्पन्न गराउनका लागि म्यादी प्रहरीलाई निश्चित अवधिको तालिम दिएर कार्यक्षेत्रमा खटाइनेछ। भर्ना प्रक्रिया सुरु भएसँगै देशभरका जिल्ला सदरमुकामहरूमा युवाहरूको उपस्थिति बाक्लो देखिएको छ। 

भर्नाको पहिलो दिन काठमाडौंको भद्रकालीस्थित प्रहरी परिसरमा युवाहरूको लामो लाइन देखियो। बिहान १० बजेदेखि नै आवेदन दिन आएका युवाहरू सडकसम्मै लाइन लागेका थिए। उपत्यकाका ललितपुर र भक्तपुर परिसरमा पनि उत्तिकै संख्यामा युवाहरू आवेदन बोकेर पुगेका छन्।