ममदानीले लिए न्युयोर्कको मेयरको शपथ

एजेन्सी : जोहरान ममदानीले १ जनवरी २०२६ मा न्युयोर्क सहरको १११औँ मेयरका रूपमा शपथ लिएका छन्। सय वर्षभन्दा बढी समय यताकै सबैभन्दा कम उमेरको नगर प्रमुख चुनिएर इतिहास रचेका ३४ वर्षीय ममदानी न्युयोर्कको इतिहासमा पहिलो मुस्लिम र दक्षिण एसियाली मूलका मेयर हुन्। 

नयाँ वर्षको मध्यरातमा आयोजित विशेष समारोहमा परिवारका सदस्यहरूको उपस्थितिमा उनले कार्यभार सम्हालेका हुन्। डेमोक्रेटिक पार्टीका उम्मेदवार ममदानीले पूर्व गभर्नर एन्ड्रयू कुओमो र रिपब्लिकन उम्मेदवार कर्टिस स्लिवालाई पराजित गर्दै यो ऐतिहासिक सफलता प्राप्त गरेका हुन्। 

प्रसिद्ध भारतीय-अमेरिकी चलचित्र निर्देशक मीरा नायर र प्राध्यापक महमुद ममदानीका छोरा जोहरान सन् २०१८ मा अमेरिकी नागरिक बनेका थिए। राजनीतिमा प्रवेश गर्नुअघि उनी न्युयोर्कमा आवास संकटमा परेका न्यून आय भएका परिवारका लागि 'फोरक्लोजर काउन्सिलर' का रूपमा कार्यरत थिए। त्यही सामाजिक कार्यको अनुभवले उनलाई नीतिगत परिवर्तनका लागि राजनीतिमा प्रेरित गरेको थियो।

आफ्नो चुनावी अभियानका क्रममा धार्मिक र नश्लीय हमलाहरूको सामना गरेका ममदानीले निःशुल्क बस सेवा, विश्वव्यापी बाल हेरचाह र बढ्दो महँगी नियन्त्रणलाई आफ्नो मुख्य प्राथमिकतामा राखेका छन्। न्युयोर्क स्टेट एसेम्बलीको सदस्यका रूपमा समेत अनुभव बटुलेका उनले आफ्नो विजयलाई सहरको राजनीतिमा प्रगतिशील परिवर्तन र समावेशी नेतृत्वको नयाँ अध्यायका रूपमा व्याख्या गरेका छन्।