बानेश्वरको भवन खरानी भएपछि सिंहदरबारमा ब्युँतिदै पुरानो हल, राष्ट्रिय सभा बैठकको तयारी तीव्र (फोटो फिचर)

काठमाडौं : गत भदौ २३ र २४ गते भएको जेन-जी आन्दोलनको आक्रोशले नयाँ बानेश्वरस्थित अन्तर्राष्ट्रिय सम्मेलन केन्द्रमा रहेको  संसद भवन तोडफोड र आगजनीबाट ध्वस्त भएपछि संसदीय गतिविधि ठप्प छ।

प्रतिनिधि सभा विघटन भइसकेको अवस्थामा राष्ट्रिय सभाको बैठक बस्ने स्थानका लागि सिंहदरबारभित्रको पुरानो हललाई मर्मत गर्न थालिएको छ। आन्दोलनपछि भदौ ३१ गते मध्यरातबाट राष्ट्रिय सभाको अधिवेशन अन्त्य भएको थियो।

अब हिउँदे अधिवेशन बोलाउने तयारीस्वरूप सिंहदरबारस्थित विघठित प्रतिनिधि सभा अन्तर्गतको कृषि समितिको बैठक कक्ष अर्थात पुरानो राष्ट्रिय सभा हललाई मर्मत सम्भार गरी चिटिक्क पार्ने काम भइरहेको छ।

राष्ट्रिय सभा अध्यक्ष नारायण प्रसाद दाहालले पुस १२ गते आसपास बैठक बोलाउने तयारी गरेसँगै करिब ३० लाख रुपैयाँ खर्चेर हलको मर्मत सुरू गरिएको हो।

शहरी विकास मन्त्रालय अन्तर्गतको समितिले सिभिल वर्क र संसद सचिवालयले प्राविधिक व्यवस्थापनको काम गरिरहेका छन्।

निर्माणाधीन संघीय संसद भवन तयार हुन अझै समय लाग्ने भएपछि यो हललाई अस्थायी विकल्पका रूपमा प्रयोग गर्न लागिएको हो।

यहाँ सांसद, सरकार पक्ष र कर्मचारी गरी ८० देखि ८५ जना र पत्रकार तथा दर्शकका लागि करिब ६० वटा कुर्सीको व्यवस्थापन गरिँदैछ।