ट्रम्पद्वारा कारमा थप २५ प्रतिशत करको घोषणा, व्यापार युद्धको खतरा गहिरिँदै
एजेन्सी : अमेरिकी राष्ट्रपति डोनाल्ड ट्रम्पले अमेरिका भित्रने कार र यसका पाटपूर्जामा २५ प्रतिशत थप भन्सारको घोषणा गरेका छन्।
ट्रम्पको यो कदमले विश्वव्यापी व्यापार युद्ध सुरु हुने सम्भावना बढाएको छ।
ट्रम्पले नयाँ करहरू अप्रिल २ देखि लागू हुने बताएका छन्। कारका पार्टपुर्जामा यी करहरू मे महिना वा पछि सुरू हुनेछन्।
राष्ट्रपतिले आफ्नो कदमले कार उद्योगमा ‘ठूलो वृद्धि’ हुने दाबी गरे। उनले यो कदमले अमेरिकामा रोजगारी र लगानी पनि बढाउने वाचा गरे।
तर, यस विषयमा विज्ञहरूको राय फरक छ। ट्रम्पको कदमले अमेरिकामा कार उत्पादन अस्थायी रूपमा रोक्न सक्छ, मूल्य बढाउन सक्छ र सहयोगी देशहरूसँगको सम्बन्धमा तनाव उत्पन्न गर्ने उनीहरूको भनाइ छ।
संयुक्त राज्य अमेरिकाले गत वर्ष लगभग ८० लाख कार आयात गरेको थियो, जुन लगभग २४० अर्ब डलर बराबरको व्यापार थियो।
अमेरिकामा कार पठाउनेमा मेक्सिको सबैभन्दा अगाडि छ। यसपछि दक्षिण कोरिया, जापान, क्यानडा र जर्मनी पर्छन्।
ट्रम्पको यो नयाँ कदमले विश्वव्यापी कार व्यापार र यसको आपूर्ति श्रृंखलालाई असर गर्ने खतरा छ।
चैत १४, २०८१ बिहीबार ०७:४९:३९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।
