ट्रम्प र भान्सको हप्कीदप्की खाएर ह्वाइट हाउसबाट निस्किए जेलेन्स्की

एजेन्सी : अमेरिकी राष्ट्रपति डोनाल्ड ट्रम्प र युक्रेनी राष्ट्रपति भोलोदिमिर जेलेन्स्कीबीच शुक्रबार राति ह्वाइट हाउसमा भेटवार्ता भएको छ। यस क्रममा ट्रम्प, उपराष्ट्रपति जेडी भान्स र जेलेन्स्कीबीच चर्को बहस भयो।

भान्सले जेलेन्स्कीमाथि संयुक्त राज्य अमेरिकाको अपमान गरेको आरोप लगाए। सोही समयमा, ट्रम्पले युक्रेनी राष्ट्रपतिलाई धेरै पटक हप्काए। ट्रम्पले जेलेन्स्कीलाई तेस्रो विश्वयुद्धमा जुवा खेलेको आरोप लगाए।

यसपछि, रिसाएका जेलेन्स्की कुराकानीबाट उठे र आफ्नो कालो एसयूभीमा छिटो बाहिर निस्केर होटलतिर लागे। दुई नेताहरूबीच खनिजको सम्बन्धमा सम्झौता हुने तय भए पनि वार्ता रद्द भयो।

ह्वाइट हाउसमा के भयो?
राति १० बजेतिर ट्रम्पलाई भेट्न जेलेन्स्की ह्वाइट हाउस पुग्दा ट्रम्प ढोकामा आएर उनलाई स्वागत गरे। दुवैले हात मिलाए, त्यसपछि ट्रम्पले जेलेन्स्कीतिर औंल्याउँदै मिडियालाई भने, ‘उहाँ आज राम्रो तयारीका साथ आउनुभएको छ।’

दुवै राष्ट्रपति ह्वाइट हाउसको ओभल हाउस पुगे। यहाँ मिडियाको अगाडि दुई जना बीचको कुराकानी सुरु भयो। ट्रम्पले भने कि यदि उनी र जेलेन्स्की मिलेर रूस र युक्रेन बीचको युद्ध रोक्न सके भने यो धेरै राम्रो हुनेछ। जेलेन्स्कीले ट्रम्पलाई युद्धका तस्बिरहरू देखाए।

ट्रम्पसँगको कुराकानीको क्रममा जेलेन्स्कीले शान्ति सम्झौतामा रुसी राष्ट्रपति पुटिनसँग कुनै सम्झौता गर्ननहुने धारणा राखे। त्यसमा ट्रम्पले आफूहरूले पनि युद्ध चाँडै समाप्त होस् भन्ने चाहेको भन्दै खनिज सम्झौताको विषयमा उनको कदर गरे।

ट्रम्प र जेलेन्स्कीबीच लगभग ३० मिनेटसम्म राम्रो कुराकानी भयो। तर उपाध्यक्ष जेडी भान्सले कुराकानीमा बाधा पुर्याएपछि यो बहसमा परिणत भयो।

के विषयमा भयो विवाद?
भान्स: युक्रेनमा शान्ति र समृद्धिको बाटो कूटनीतिबाट मात्र हुनेछ। राष्ट्रपति ट्रम्प यही गरिरहेका छन्। तपाईंको मनोवृत्ति धेरै अनादरपूर्ण छ। यो उचित कूटनीति होइन। यो युद्ध रोक्नुभएकोमा तपाईंले राष्ट्रपति ट्रम्पलाई धन्यवाद दिनुपर्छ।

जेलेन्स्की (भान्ससँग): जब २०१४ मा रूस-युक्रेन युद्ध सुरु भयो, त्यहाँ धेरै वार्ताहरू भए। २०१९ मा मैले एउटा सम्झौतामा हस्ताक्षर गरेँ। मलाई युद्धविराम लागू हुने आश्वासन दिइएको थियो। दुवै पक्षका युद्धबन्दीहरूलाई रिहा गरिनेछ, तर पुटिनले यो सम्झौता तोडेर २०२२ मा ठूलो आक्रमण गरे।

जेलेन्स्की (भान्सलाई हेर्दै): यो कस्तो प्रकारको कूटनीति हो, जेडी भान्स? यसको अर्थ के हो?

भान्स: म त्यो कूटनीतिको बारेमा कुरा गर्दैछु, जसले तपाईंको देशमा भइरहेको विनाशलाई रोक्नेछ।

भान्स: मलाई लाग्छ कि ओभल अफिसमा आएर अमेरिकी मिडियाको अगाडि यो कुरा उठाउनु तपाईंको अनादर हो। तपाईंसँग आवश्यक सेना नभएकोले तपाईं सीमामा कमजोर हुनुहुन्छ। युद्धमा सहयोग गरेकोमा तपाईंले राष्ट्रपति ट्रम्पलाई धन्यवाद दिनुपर्छ।

जेलेन्स्की (भान्सलाई रोक्दै): के तपाईं युक्रेन जानुभएको छ, के तपाईंले कहिल्यै हामीले त्यहाँ सामना गरिरहेका समस्याहरू देख्नुभएको छ? एकपटक आएर हेर्नुहोस्।

भान्स: मैले यसको बारेमा पढेको छु र देखेको छु। तर के तपाईंलाई लाग्छ कि त्यो देशको प्रशासनप्रति अनादरपूर्ण मनोवृत्ति देखाउनु सही हो, जुन देशले तपाईंको देशको विनाश रोक्न चाहन्छ?

जेलेन्स्की: युद्धले सबैलाई समस्या नै हुन्छ। यो युद्धले भविष्यमा अमेरिकालाई पनि असर गर्नेछ।

(यो सुनेर ट्रम्प रिसाउँछन् र कुराकानीमा सामेल हुन्छन्)

ट्रम्प: हामीले के सोच्नुपर्छ भनेर नभन्नुहोस्। हामीले कस्तो महसुस गर्नुपर्छ भनेर भन्न सक्ने स्थितिमा तपाईं हुनुहुन्न।

जेलेन्स्की: म तिमीलाई भन्दिनँ। म त उहाँ(भान्स)को प्रश्नको जवाफ दिइरहेको छु।

(ट्रम्पले जेलेन्स्कीलाई फेरि चुप लगाउँछन्।)

ट्रम्प (औँला देखाउँदै): तपाईं हामीलाई केही भन्न सक्ने अवस्थामा हुनुहुन्न। तपाईंसँग चाल्नका लागि कुनै चाल छैन। तपाईं लाखौं मानिसहरूको जीवनसँग खेलिरहनुभएको छ। तपाईं तेस्रो विश्वयुद्धको सम्भावनामा जुवा खेल्दै हुनुहुन्छ। तपाईं यो देशको अपमान गर्दै हुनुहुन्छ।

जेलेन्स्की (रोक्दै): हामी यो युद्धको सुरुवातदेखि नै एक्लै छौँ र हामी त्यसको लागि कृतज्ञ छौँ।

ट्रम्प (रिसाउँदै): तपाईं एक्लो हुनुहुन्न। तपाईं पक्कै पनि एक्लो हुनुहुन्न। हामीले तपाईंलाई यो मूर्ख राष्ट्रपति (बाइडेन) मार्फत ३५० अर्ब डलर दियौँ।

जेलेन्स्की: म तपाईंलाई धेरै सम्मान गर्छु।

(भान्स फेरि एक पटक यस कुराकानीमा प्रवेश गर्छन्)

भान्स: के तपाईंले यो बैठकमा एक पटक पनि ‘धन्यवाद’ भन्नुभयो?

जेलेन्स्की: धेरै पटक भनेँ र आज पनि...

भान्स: होइन, तपाईं अक्टोबरमा पेन्सिलभेनिया जानुभयो र त्यहाँ हाम्रो विपक्षीको लागि प्रचार गर्नुभयो। अमेरिका र तपाईंको देश बचाउन प्रयासरत राष्ट्रपतिप्रति केही कृतज्ञता देखाउनुहोस्।

जेलेन्स्की: तपाईंलाई लाग्छ कि यदि तपाईंले युद्धको बारेमा ठूलो स्वरमा कुरा गर्नुभयो भने...

(ट्रम्पले उनीहरूको कुराकानीलाई रोक्छन्)

ट्रम्प: उनी (भान्स) ठूलो स्वरले बोलिरहेका छैनन्। तपाईंको देश ठूलो संकटमा छ।

(जेलेन्स्कीले बोल्न खोज्छन्, तर ट्रम्पले हात हल्लाएर उनलाई रोक्छन्।)

ट्रम्प: होइन, होइन, तपाईंले धेरै भनिसक्नुभयो। तपाईंको देश ठूलो समस्यामा छ।

जेलेन्स्की: मलाई थाहा छ, मलाई थाहा छ।

ट्रम्प (कडा स्वरमा): तपाईंले यो युद्ध जित्नुहुन्न। तर हाम्रो कारणले गर्दा, तपाईंसँग यो सुरक्षित र स्वस्थ तरिकाले युद्धबाट बाहिर निस्कने ठूलो मौका छ।

जेलेन्स्की (ट्रम्पलाई रोक्दै): हामी युद्धको सुरुवातदेखि नै एक्लै छौँ...

(बीचमा, जेलेन्स्कीले आफ्नो कुरा प्रस्तुत गर्ने प्रयास गर्छन् तर ट्रम्पले उनलाई बोल्न दिँदैनन्।)

ट्रम्प: तपाईं एक्लो हुनुहुन्थ्यो। हामीले तपाईंलाई मूर्ख राष्ट्रपति (बाइडेन) मार्फत ३५० अर्ब डलर दियौँ। सैन्य उपकरणहरू दियौँ। यदि हामीसँग हतियार नभएको भए, यो युद्ध दुई हप्तामा समाप्त भइसक्थ्यो।

जेलेन्स्की: ३ दिन... पुटिनले तीन दिनमा सबै सकिने बताएका थिए।

ट्रम्प: यसको कुनै अर्थ छैन। त्यस्तो सम्झौता गर्न धेरै गाह्रो हुनेछ। तपाईंले आफ्नो दृष्टिकोण परिवर्तन गर्न आवश्यक छ।

(कुराकानीको बीचमा भान्स फेरि प्रवेश गर्छन्)

भान्स: अब छोड, धन्यवाद भन।

जेलेन्स्की: मैले यो धेरै पटक भनेको छु।

भान्स: तपाईं मिडियासमक्ष यसरी कुरा गर्दै हुनुहुन्छ। तर तपाईं गलत हुनुहुन्छ भन्ने हामीलाई थाहा छ।

(ट्रम्प फेरि कुराकानीमा प्रवेश गर्छन्)

ट्रम्प: तपाईंले धन्यवाद भन्नुपर्छ। मानिसहरू मरिरहेका छन्। तपाईंहरू लडाईंमा धेरै पछाडि हुनुहुन्छ। तपाईं सधैँ भन्नुहुन्छ ‘म युद्धविराम गर्दिन’ (जेलेन्स्कीको नक्कल गर्दै)। तर यो तपाईंले गर्नुपर्छ। यदि अहिले नै युद्धविराम हुन सक्छ भने, म तपाईंलाई त्यही गर्न आग्रह गर्नेछु, ताकि गोलीबारी बन्द होस्।

जेलेन्स्की (शान्त स्वरमा): अवश्य पनि, म युद्ध रोक्न चाहन्छु... म ठोस ग्यारेन्टीसहितको युद्धविराम चाहन्छु। तपाईंले युक्रेनका जनतालाई युद्धविरामको बारेमा के सोच्नुहुन्छ भनेर सोध्नुहोस्।

यो घटनापछि ट्रम्पले सामाजिक सञ्जाल ट्रुथ सोसलमा जेलेन्स्कीले शान्ति नचाहेको आरोप लगाए।

ट्रम्पले ट्रुथ सोसलमा उनले लेखे, ‘आज ह्वाइट हाउसमा हाम्रो धेरै महत्त्वपूर्ण बैठक भयो। हामीले त्यस्ता कुराहरू सिक्यौं जुन हामीले दबाबपूर्ण छलफल बिना कहिल्यै बुझ्न सक्ने थिएनौँ। भावनाहरूको बीचमा जे निस्कन्छ त्यो अचम्मको कुरा हो। मैले बुझेको छु कि यदि संयुक्त राज्य अमेरिकाले शान्ति ल्याउने प्रयास जारी राख्यो भने, राष्ट्रपति जेलेन्स्की शान्तिको लागि तयार हुनुहुने छैन। किनभने उहाँहरूलाई लाग्छ कि हाम्रो सहभागिताले अमेरिकालाई वार्तामा ठूलो फाइदा पुर्याउँछ। मलाई कुनै फाइदा चाहिदैन, म शान्ति चाहन्छु। जेलेन्स्कीले अमेरिकाको सम्मानित ओभल अफिसमा नै अमेरिकाको अपमान गरे। जब तिनीहरू शान्तिको लागि साँच्चै तयार हुन्छन् तब तिनीहरू फर्कन सक्छन्।’

विवादपूर्ण र अपमानित छलफलपछि ह्वाइटहाउसबाट बाहिरिएका जेलेन्स्कीले एक्समा पोस्ट लेख्दै सबै अमेरिकी जनतालाई धन्यवाद दिए।

उनले लेखे, ‘धन्यवाद अमेरिका, तपाईंको समर्थनको लागि धन्यवाद, यो भ्रमणको लागि धन्यवाद। अमेरिकी राष्ट्रपति, कांग्रेस र अमेरिकी जनतालाई धन्यवाद। युक्रेनलाई न्यायपूर्ण र दिगो शान्ति चाहिन्छ, र हामी त्यसैको लागि काम गरिरहेका छौँ।’

जेलेन्स्की र ट्रम्पबीचको यस बैठकमा खनिज सम्बन्धी सम्झौता हुने तय भएको थियो तर यो सम्झौता रद्द गरियो। युक्रेनले अमेरिकालाई दुर्लभ पृथ्वीका सामग्री आपूर्ति गर्न सहमति जनाएको छ।

यो सम्झौताको बदलामा अमेरिकाले युक्रेनको पुनर्विकासमा मद्दत गर्ने बताएको छ। ट्रम्पले गत महिनादेखि युक्रेनलाई दुर्लभ खनिज पदार्थ दिन दबाब दिइरहेका थिए। यदि यसो भएन भने, उनीहरूले अमेरिकी कोष रोक्ने धम्की दिए।

फागुन १७, २०८१ शनिबार ०९:२९:२६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।