१० मिनेटको काँटछाँटपछि फिल्म 'ताण्डवम्' को सेन्सर पास

काठमाडौं : अत्याधिक हिंसात्मक दृश्य रहेको भन्दै सेन्सर रोकिएको सिनेमा 'ताण्डवम्' व्यापक काँटछाँटपछि पास भएको छ। केन्द्रीय चलचित्र जाँच पास समिति (सेन्सर बोर्ड) ले पीजी सर्टिफिकेट दिएको निर्देशक जुनिम गहतराजले बताए ।

सिनेमा हेर्न १६ वर्ष मुनिका बालबालिकाले अभिभावक साथ लिएर जानु पर्नेछ। सेन्सर पास नभएर फिल्मको प्रिमियर रोकिएपछि निर्माण टिमले सेन्सरले पून सम्पादन गर्न निर्देशन दिएका दृश्यहरू काटेमा फिल्मको कथामै असर पर्ने दाबी गरेका थिए।

निर्देशक गहतराजले कथाको मर्म नमर्ने गरी सिनेमाका हिंसात्मक दृश्य काटिएको दाबी गरे। निर्माण टिमका अनुसार सेन्सरको निर्देशनबाट फिल्मको १० मिनेटका दृश्य झिकिएको छ।

पहिलो पटक सेन्सर गर्न लैजाँदा २ घण्टा ६ मिनेट लामो सिनेमालाई दोस्रो सेन्सरबाट करिब १ घण्टा ५६ मिनेटको बनाइएको छ। पुष्कर गुरुङ, प्रेम सुब्बा, जुनिम गहतराज, अङ्कित खड्का, सरिना मगर, अनोज पाण्डे, कमल कार्की र गोपाल कटुवालको अभिनय रहेको फिल्म शुक्रवार रिलिज हुँदैछ।

फागुन ८, २०८१ बिहीबार २२:०८:०९ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।