लाइभ कन्सर्टमा युवतीको ओठमा किस गरेपछि उदितनारायणले भने 'यो पागलपन हो, हामी सभ्य मानिस हौं'

एजेन्सी : गायक उदित नारायण झाको एउटा भिडिओ यतिबेला चर्चामा छ। भिडिओ लाइभ कन्सर्टको हो, जसमा गायक आफ्ना महिला फ्यानहरूलाई चुम्बन गरिरहेको देखिन्छ।

फ्यानले सेल्फीका लागि बाउन्सरसँग अनुमति लिइरहँदा उदित ती महिला भएको ठाउँमा आउँछन्, नजिकै बस्छन् र गालामा चुम्छन्। क्लिपमा उनले अरू दुई महिला फ्यानलाई पनि यसैगरी चुमेको देखिएको छ।

अहिले उनी त्यस भिडिओलाई लिएर विवादित छन्। केही मानिसले उनीमाथि प्रश्न उठाइरहेका छन्। 

भिडिओलाई लिएर हङ्गामा भएपछि उदितले हिन्दुस्तान टाइम्ससँगको कुराकानीमा यो क्षणलाई ‘प्रेमको अभिव्यक्ति’ भनेका छन्। 

उदितले भने, 'फ्यानहरू धेरै पागल छन्, होइन र? हामी त्यस्तो होइनौं। हामी सभ्य मानिस हौँ। कतिपयले यसलाई प्रोत्साहन गर्छन् र यसमार्फत आफ्नो प्रेम व्यक्त गर्छन्। यो कुरा उडाएर के गर्ने? भीडमा धेरै मानिसहरू छन् र हामीसँग अंगरक्षकहरू पनि छन्। तर, फ्यानहरुले भने भेट्ने मौका पाएको महसुस गरेका छन्। त्यसैले कसैले हात फैलाउँछ, कसैले हात चुम्बन गर्छन्। यो सब पागलपन हो, यसमा त्यति ध्यान दिनु हुँदैन।'

भाइरल भिडिओमा उदित शोमा फिल्म ‘मोहरा’को हिट गीत ‘टिप–टिप बरसा पानी’ गाउँदै गरेको देखिन्छ। त्यसपछि केही महिला फ्यानहरू उनीसँग सेल्फी लिन स्टेज नजिक पुग्छन्। उदितले पनि मायापूर्वक उनीसँग सेल्फी लिन्छन् र त्यसपछि उनको गालामा चुम्बन गर्छन्।

यसपछि उदित स्टेजको अर्को छेउमा जान्छन् र त्यहाँ बाउन्सरलाई सङ्केत गर्छन् महिला फ्यानहरूलाई स्टेजको नजिक आउनबाट रोक्न। त्यसपछि उनी महिला फ्यानसँग स्टेजमा घुँडा टेकेर बस्छन् र फोटो खिचेपछि उनको ओठमा चुम्बन गर्छन्।

यसबारे उदित भन्छन्, 'मेरो छोरा आदित्य सधैँ शान्त छ। विवादमा आउँदैन। जब म स्टेजमा गाउँछु यो पागलपन हो। फ्यानहरूले मलाई माया गर्छन्, मलाई पनि लाग्छ उनीहरू खुसी होस्। खैर, हामी यस प्रकारका मानिसहरू होइनौं। हामीले पनि उनीहरुलाई खुशी बनाउनुपर्छ।'

रेडियो नेपालबाट आफ्ना करियर शुरू गरेका उदितले १९८० मा आएको फिल्म ‘उन्नी–बीस’ बाट प्लेब्याक डेब्यू गरेका थिए। १९८८ को फिल्म ‘कयामत से कयामत तक’बाट उनी चर्चामा आएका थिए।

माघ २०, २०८१ आइतबार १३:२७:१० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए ukeraanews@gmail.com मा पठाउनु होला।