पेस्तोलसहित भारतीय नागरिक पक्राउ
रौतहट : रौतहटबाट सशस्त्र प्रहरीले पेस्तोलसहित एक भारतीय नागरिकलाई पक्राउ गरेको छ।
नेपाल भारत सीमा क्षेत्र नजिक पर्ने इशनाथ नगरपालिका-४ को लतमरीबाट सशस्त्र प्रहरीले आईतबार राति पक्राउ गरेको हो।
भारत विहार पूर्वी चम्पारण जिल्ला मोतिहारी बसन्तपुर ग्रामपञ्चाय वडा नम्वर ९ का २६ बर्षीय धनञ्जयकुमार झालाई पक्राउ गरिएको सशस्त्र प्रहरी बल नेपाल नम्बर ११ गणका गणपति (एसपी) विक्रम हुमागाईंले बताए।
उनका अनुसार पक्राउ परेका ब्यक्तीको साथबाट अटोमेटिक पेस्तोल १ थान, म्याग्जीन १ थान, ७.६७ मि.मि ४ राउण्ड गोली बरामद भएको छ। घटनास्थालबाट विआर ०५ बीडी १२२४ नम्वरको मोटरसाइकल बरामद गरिएको उनले जानकारी दिए।
तीनजना व्यक्ति एक होटलमा बसेर खाजा खाइरहेको र गतिविधि शंकाष्पद रहेको खबर पाउन साथ सशस्त्र प्रहरी बलको टोलि मठियाबाट खटिएको एसपी हुमागार्इंले बताए।
आइतबार राति साढे ८ बजेको समयमा उक्त पसलमा सशस्त्र प्रहरीको टोलि पुग्दा दुई जना भागे पनि हतियार बोकेका एक जना व्यक्तिलाई पक्राउ गर्न सफल भएको सशस्त्र प्रहरी बल नेपाल नम्वर ११ गण रौतहटले जनाएको छ।
पक्राउ परेकाको आवश्यक कारवाहीका लागि नेपाल प्रहरीलाई जिम्मा लगाउने तयारी भइरहेको रौतहट सशस्त्र प्रहरीले जानकारी दिएको छ।
माघ ७, २०८१ सोमबार १०:३५:४५ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
