बागमती सरकारले समस्याग्रस्त दुई वटा सहकारी संस्थामा तालाबन्दी गर्यो

हेटौंडा : बागमती प्रदेश सरकारले समस्याग्रस्त घोषणा गरेका दुई वटा सहकारी संस्थामा तालाबन्दी गरेको छ।

प्रदेशको सहकारी तथा गरिबी निवारण मन्त्रालयले समस्याग्रस्त घोषणा गरेका तीन सहकारी संस्थामध्ये लालीगुराँस बचत तथा ऋण सहकारी संस्था र नेशनल नमोबुद्ध बचत तथा ऋण सहकारी संस्थाको काठमाण्डौंस्थित केन्द्रीय कार्यालयमा तालाबन्दी गरिएको हो।

सुमेरू सेभिङ एन्ड क्रेडिट कोअपरेटिभ, लालीगुराँस बचत तथा ऋण सहकारी संस्था र नेशनल नमोबुद्ध बचत तथा ऋण सहकारी संस्थालाई यसअघि मन्त्रालयले समस्याग्रस्त सहकारी घोषणा गरेको थियो। 

प्रदेश सरकार अन्तर्गत रहेको समस्याग्रस्त सहकारी व्यवस्थापन समितिले आइतबार लालीगुराँस बचत तथा ऋण सहकारी संस्थाको सञ्चालन समितिलाई निलम्बन गर्दै कार्यालयमा तालाबन्दी गरेको हो।

समितिका सदस्यसचिव महेश आचार्यले सहकारीको केन्द्रीय कार्यालयमा तालाबन्दीसँगै सहकारीले प्रयोग गर्दै आएको सर्भरलगायतका सामग्री नियन्त्रणमा लिएको जानकारी दिए। 

उनले भने, ‘सहकारीको खाता रोकिएको छ, सहकारीका सेयर सदस्यको पनि खाता रोक्का हुन्छ। सहकारी संस्थाको सञ्चालक समिति निलम्बित भएको छ, अब हाम्रो जिम्मेवारीमा आएको छ।’

उनका अनुसार नेशनल नमोबुद्ध बचत तथा ऋण सहकारी संस्थामा यसअघि नै तालाबन्दी गरी सञ्चालक समितिलाई निलम्बन गरेर छानबिनको प्रक्रिया अगाडि बढाइएको छ।

नेशनल नमोबुद्ध बचत तथा ऋण सहकारी संस्थामा तालाबन्दी गरी सहकारीको आयव्यय, दायित्वलगायतका अवस्था बुझ्न बागमती प्रदेशको समस्याग्रस्त सहकारी व्यवस्थापन समितिका अध्यक्ष प्रभात अधिकारीसहितको टोलीले सहकारीमा रहेका कम्प्युटरको हार्डडिक्स, खातालगायतका सामग्री नियन्त्रणमा लिएको थियो।

सदस्यसचिव आचार्यले सुमेरू सेभिङ एन्ड क्रेडिट कोअपरेटिभको कागजात हेटौंडामा रहेको प्रदेशको सहकारी महाशाखाबाट आएपछि कारबाही प्रक्रिया अगाडि बढाइने बताए।

उनले उक्त सहकारीबारे यसअघि सिआइबीले छानबिन गरिरहेकाले कम प्राथमिकतामा राखिएको र कागजात आएपछि छानबिनको प्रक्रिया अगाडि बढाउने बताए।

यसअघि प्रदेशका सहकारी तथा गरिबी नियन्त्रणमन्त्री मदुकुमार श्रेष्ठको मन्त्रीस्तरीय निर्णयबाट यी तीन वटा सहकारी संस्थालाई समस्या ग्रस्त सहकारी घोषणा गरिएको थियो। यी सहकारी संस्थाले वित्तीय दायित्व पूरा नगरेको, बचतकर्ताको बचत माग गर्दा फिर्ता नगरेको, बचत फिर्ता गर्ने कार्ययोजना बनाएर पनि कार्ययोजना अनुसार काम नगरेको भन्दै मन्त्रालयले समस्या ग्रस्त सहकारी घोषणा गरेको हो।

सहकारी महाशाखाका रजिस्ट्रार कुमार तामाङले सेयर सदस्यको उजुरी र सहकारी संस्थाले समयमा बचतकर्ताको बचत फिर्ता गर्न नसकेपछि समस्याग्रस्त सहकारी घोषणाको निर्णयमा पुगेको बताए।

उनले उजुरीको सम्बोधन गर्न समस्या ग्रस्त सहकारीका सञ्चालकलाई पटक पटक ताकिता गर्दा पनि सुनुवाइ नभएको भन्दै समस्या ग्रस्त घोषणा गरिएका सहकारी संस्थाको सञ्चालक समिति निलम्बनपछि समस्या ग्रस्त सहकारी व्यवस्थापन समितिले हेर्ने बताए।

तीनवटा सहकारीबाट गरी सेयर सदस्यले करिब चार अर्ब रूपियाँको माग दाबीसहित उजुरी दर्ता गराएका छन्। सुमेरुका ८४८ वटा उजुरी, लालीगुराँसका ९७२ र नेशनल नमोबुद्धका सय जनाभन्दा बढी सेयर सदस्यको उजुरी सहकारी संस्थाविरुद्ध महाशाखामा परेको छ।

महाशाखाका रजिस्ट्रार तामाङले सुमेरु सेभिङ एन्ड क्रेडिट कोअपरेटिभका सेयर सदस्यले एक अर्ब ६१ करोड रूपियाँभन्दा बढी माग दाबीसहित निवेदन दिएको बताए। 

उनका अनुसार नेशनल नमोबुद्ध बचत तथा ऋण सहकारी संस्थाका सेयर सदस्यले १२ करोड २७ लाख रूपियाँभन्दा बढी र सुमेरू सेभिङ एन्ड क्रेडिट कोअपरेटिभका सेयर सदस्यले दुई अर्ब २५ करोड रूपियाँभन्दा बढी माग दाबीसहित उजुरी दिएका छन्। 

माघ ३, २०८१ बिहीबार २०:२४:१६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।