नाम जस्तै धार्मिक कनेक्सन रहेको फिल्म ‘ताण्डवम्’को पोस्टर सार्वजनिक

काठमाडौं : जुनिम गहतराजको निर्देशनमा बनेको फिल्म ‘ताण्डवम्’को पोस्टर रिलिजसहित प्रदर्शन मिति घोषणा गरिएको छ। मंगलबार माघे सङ्क्रान्तिको अवसरमा पोस्टर सार्वजनिक गर्दै सिनेमा फागुन ९ बाट प्रदर्शनमा आउने जानकारी दिइएको हो।

सार्वजनिक पोस्टरमा मुख्य कलाकारहरू पुष्कर गुरुङ, प्रेम सुब्बा, सरिना मगर, अंकित खड्का, अनोज पाण्डे र जुनिम गहतराज प्रस्तुत छन्। कमल कार्की र गोपाल कटुवालको पनि सिनेमामा अभिनय रहेको छ।

यो फिल्मबाट कलरिस्ट जुनिमले निर्देशनमा डेब्यु गरेका हुन्। 

महाशिवरात्रीको छेको पारेर प्रदर्शनमा आउन लागेको फिल्मले नाम जस्तै धार्मिक कनेक्सन पनि रहेको निर्माण टिमले जानकारी दिएको छ। 

एक नव विवाहित जोडी जो आफ्नो पहिलो सन्तानको स्वागतको तयारी गरिरहँदा उनीहरू जीवनमा घट्ने अकल्पनीय घटनाले निम्त्याउने उतारचढावको कथालाई पारिवारिक तथा एक्सन थ्रिलर जनरामा प्रस्तुत गरिएको छ।

सिंहदेवी प्रोडक्सनको ब्यानरमा निर्माण भएको फिल्मका निर्माता धनकुमारी गहतराज, सविना मगर र मनिष गौतम हुन्।

हरि घले लामाले खिचेको फिल्ममा सम्राट बस्नेतको एक्सन निर्देशन, सुशान्त गौतमको संगीत र कोबिद बज्रको ब्याग्राउण्ड म्युजिक रहेको छ। फिल्मको कथा, पटकथा तथा संवाद अनिरुद्ध आत्रेय र हुसेनले लेखेका हुन्।

माघ १, २०८१ मंगलबार १९:४१:२५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।