रक्सी खाएपछि भरुवा बन्दुकले श्रीमतीको छातीमा गोली हानी हत्या गरेको आरोपमा श्रीमान् पक्राउ
काठमाडौं : डडेल्धुराको अमरगढी नगरपालिका-३ पथरोडामा श्रीमतीको हत्या गरेको आरोपमा श्रीमान्लाई पक्राउ गरिएको छ।
घरायसी विवादका क्रममा २४ वर्षीया श्रीमती अस्मिता थापामगरलाई गोली हानेर हत्या गरेको भन्दै ३२ वर्षीय डम्बरबहादुर थापामगरलाई पक्राउ गरिएको प्रहरीले जनाएको छ।
जिल्ला प्रहरी कार्यालयका प्रमुख डिएसपी सुगन्ध श्रेष्ठले मादकपदार्थ सेवन गरेका थापामगर आफ्नो घरमा रहेको एकनाले भरुवा बन्दुकले छातीमा गोली प्रहार गरी हत्या गरेका जानकारी आएको बताए।
लगत्तै प्रहरीचौकी बागबजारका इन्स्पेक्टर चन्द्रसिंह धामीको कमाण्डमा प्रहरी टोली घटनास्थलमा पुगेको र थापामगरलाई घरदेखि करिब दुई सय मिटर टाढा जङ्गलमा भरुवा बन्दुकसहित भाग्दै गरेको अवस्थामा पक्राउ गरिएको डिएसपी श्रेष्ठले बताए।
हाल उनलाई हिरासतमा राखी थप अनुसन्धान भइरहेको जिल्ला प्रहरी कार्यालय डडेल्धुराले जनाएका छ।
पुष २९, २०८१ सोमबार २१:५५:४६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
