कथा, अभिनय, निर्देशन, संगीत सबैतिर भ्याइरहेका प्रकाश सपूतलाई प्रश्न 'कहिलेसम्म?'

काठमाडौं : गायक प्रकाश सपूतको परिचय सङ्गीतकार, गीतकार, अभिनेता र निर्देशकका रूपमा स्थापित छ। गीत र श्रव्यदृश्यमार्फत आफ्नो कथालाई व्यक्त गरिरहेका गायक सपूतले चलचित्र निर्माण गरेका छन्, ‘बसन्त’। यसमा पनि उनको बहुपक्षीय भूमिका छ। 

एकै व्यक्तिले यति धेरै भूमिका निर्वाह गर्न कठिनाइ हुँदैन, अनि यी धेरैखाले भूमिका कहिलेसम्म? भन्ने जिज्ञासामा प्रकाशले आउँदा दिनमा एक विधामा मात्र केन्द्रित हुने बताए। 

उनी निर्देशित पहिलो चलचित्र ‘बसन्त’मा समावेश पहिलो गीत ‘साँझ पर्यो झमक्कै’को गीत र श्रव्यदृश्य सार्वजनिक गर्न शनिबार साँझ दरबारमार्गमा आयोजित पत्रकार सम्मेलनमा गायक सपूतले आफ्नो समूहका कारण यसपटक सफल भए पनि आउँदा दिनमा एक विधाबाहेक अरूको जिम्मेवारी नलिने बताए। 

'आफैंले सबै काम गर्दा गाह्रो नै हुनेरहेछ। विशेषतः निर्देशन र अभिनय एकैपटक गर्दा दुवैमा ऊर्जा बाँडिएको महसुस भयो। त्यसैले आउँदो चलचित्रमा म निर्देशक भएमा आफ्नो दृश्यलाई निकै कम राख्छु, नत्र सुनिल विकलाई निर्देशनको जिम्मेवारी दिन्छु, उनले भने, म अभिनयमा मात्र केन्द्रित हुन्छु। किनकि मेरै पछिल्ला कामभन्दा कमजोर नहोस् भन्ने मेरो प्रयास रहन्छ।'

यस विषयमा अभिनय र निर्देशनसँगै गरिरहेका निश्चल बस्नेत, अर्पण थापालगायतसँग छलफल गरेको प्रकाशले बताए। उनले गायनमै व्यस्त हुँदा चलचित्र निर्देशनमा आउनु कथालाई धेरै दर्शकसम्म पुर्याउने चाहना भएको बताए। 

'भोगाइ, देखाइसहितका आफ्ना कथा गीतमार्फत व्यक्त गरिरहेको थिएँ। मलाई ती कथा गीतमै सकाउँछु कि भन्ने लाग्यो। त्यही भएर चलचित्र बनाउने योजनालाई मूर्तरूप दिएको हुँ। यो मजस्ता धेरै मध्यमवर्गीय युवाको कथा हो, उनले भने। 

यो चलचित्रको कथामा आफ्नो बालापन र भोगाइ भए पनि आफ्नै जीवनी भने नरहेको उनले सुनाए। 

अभिनेत्री स्वस्तिमा खड्काले प्रकाश सपूतले एउटा परिपक्व चलचित्रकर्मी भएर काम गरेको बताइन्। 

'गायक सपूतलाई मैले नयाँजस्तो कहीँकतै पाइँन। उहाँको काममा परिपक्वता थियो, जसलाई दर्शकले छिट्टै पर्दामा महसुस गर्नुहुनेछ। यो चलचित्रमा जोडिएर शान्ति नामक पात्र बाँच्न पाउँदा आफूलाई भाग्यमानी ठानेकी छु। यो मलाई वर्षौँसम्म सम्झिने पात्र बन्ने छ, उनले भनिन्। 

सार्वजनिक गरिएको ‘साँझ पर्यो झमक्कै’ गीतमा शब्द, सङ्गीत र स्वर सपूतकै रहेको छ भने गायनमा शान्तिश्री परियारले साथ दिएकी छन्।  चलचित्रमा प्रभात पाल ठकुरी, अनुप बराल, कमलमणि नेपाल, प्रकाश घिमिरेलगायत कलाकारको अभिनय छ।

आर्थिक रूपमा विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने सङ्घर्षलाई चलचित्रको विषय बनाइएको निर्माण पक्षले जनाएको छ। 

यो चलचित्र आगामी चैत २२ देखि प्रदर्शनमा आउने छ।  

पुष २८, २०८१ आइतबार ०८:१३:०५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।