जय ट्रफी : मधेशविरुद्ध पुलिस एक इनिङ र ३५ रनले विजयी

काठमाडौं : जय ट्रफी एलिट कप दुई दिवसीय क्रिकेटमा नेपाल पुलिस क्लबले मधेश प्रदेशविरुद्ध एक इनिङ ३५ रनको ठूलो जित निकालेको छ।

बिहीबार वीरगञ्जस्थित नारायणी क्रिकेट मैदानमा दोस्रो इनिङ ब्याटिङ गर्न आएको मधेश प्रदेशको टोलीलाई ९४ रनमा अलआउट गर्दै जय ट्रफीमा पहिलो जित निकालेको हो।

बुधबार टस हारेर पहिला ब्याटिङमा आएको मधेश प्रदेशले पहिलो इनिङमा एक सय २९ रन बनाएको थियो।

जवाफी ब्याटिङ गर्न आएको नेपाल पुलिस क्लबले चार विकेट गुमाएर दुई सय ५८ रन बनापछि इनिङ डिक्लियर गरेको थियो।

पुलिसले इनिङ डिक्लियर गर्दा मधेशभन्दा एक सय २९ रनले नै अगाडि थियो। त्यसपछि दोस्रो इनिङमा ब्याटिङ गर्न आएको मधेश ९४ रनमा समेटियो।

उसका लागि विशाल पटेलले २७, मयन यादवले २२ र हिमांशु दत्तले १७ रन बनाउँदा बाँकी ब्याटरले दोहोरो अंकमा रन जोड्न सकेनन्।

दोस्रो इनिङमा पुलिसका कुशल भुर्तेलले पाँच विकेट लिँदा गुल्सन झा र ललित राजवंशीले दुई विकेट हात पारे।

पुष २५, २०८१ बिहीबार १४:२१:५५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।