सुपर कोप्पा इटालियनाको उपाधि एसी मिलानलाई
काठमाडौं : सुपर कोप्पा इटालियनाको उपाधि एसी मिलानले जितेको छ।
गएराति साउदीको राजधानी रियादमा भएको फाइनलमा इन्टर मिलानलाई ३-२ गोलले हराउँदै एसी मिलानले आठौँ पटक सुपर कोप्पाको उपाधि जितेको हो।
दुई गोलले पछि परेको अवस्थाबाट एसी मिलानलाई उपाधि दिलाउन थियो हर्नान्डेज, क्रिस्टियन पुलिसिच र टामी अब्राहमले गोल गरे।
पहिलो हाफको इन्ज्युरी समयमा मोहम्मद तारेमिले पास मिलाइदिएपछि लाउतारो मार्टिनेजले गोल गरे।
दोस्रो हाफको दुई मिनेटभित्रै मेहेदी तारेमीले गोल गरेपछि इन्टरले खेलमा २-० गोलको अग्रता बनाएको थियो।
तर, उसको डिफेन्स लाइनले सही ढंगले काम गर्न नसक्दा ५२औं मिनेटमै गोल बेहोर्न पुग्यो। हर्नान्डेजले खेललाई दुई-एकको अवस्थामा पुर्याए।
यस्तै ८०औं मिनेटमा हर्नान्डेजले दिएको पासको सदुपयोग गरी पुलिसिचले गोल गरेसँगै मिलानले खेलमा कमब्याक गर्यो।
खेलको निर्धारित ९० मिनेट बराबरीकै अवस्थामा सकिएको थियो। तर स्टपेज समयमा टामी अब्राहमले गोल गर्दै मिलानलाई उपाधि दिलाए।
यससँगै मिलानले आठौँ पटक सुपर कोप्पा जितेको छ। अहिलेसम्म इन्टरले पनि ८ पटक नै उपाधि जितेको छ।
सुपर कोप्पाको सबैभन्दा सफल टिम भने युभेन्टस हो उसले कीर्तिमानी नौं पटक उपाधि जितेको छ। गएराति इन्टरले युभेन्टसको कीर्तिमान बराबरी गर्ने अवसर गुमाएको हो।
पुष २३, २०८१ मंगलबार ०८:४८:५६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
