पूजा महतोको कप्तानीमा यु-१९ महिला विश्वकप खेल्ने नेपाली टोली घोषणा

काठमाडौं : नेपाल क्रिकेट संघ (क्यान)ले एसिसी यु-१९ महिला विश्वकप प्रतियोगिताका लागि नेपाली टोली घोषणा गरेको छ। क्यानले पूजा महतोको कप्तानीमा १५ सदस्यीय टोली घोषणा गरेको हो  

नेपाली टोलीका अन्य खेलाडीमा सोनी पाख्रिन (उपकप्तान), साना प्रविन, ज्योत्सिन्का मरासिनी, कुसुम गोदार, सावित्रा धामी, कृश्मा गुरुङ, रिया शर्मा, सिमाना केसी, स्नेहा महरा, किरणकुमारी कुँवर, रचना चौधरी, तृष्णा विक, अनु कडायत र एलिसा कुमारी यादव रहेका छन्। 

गत महिना भएको यु–१९ एसिया छनोटमा च्याम्पियन बन्दै नेपालले विश्वकपमा स्थान बनाएको हो। यु–१९ विश्वकप आगामी माघ ५ देखि २० सम्म मलेसियामा हुँदै छ। उक्त प्रतियोगितामा १६ टोली सहभागी हुने छन्। 

नेपाल समूह ‘डी’मा छ। उक्त समूहमा बङ्गलादेश, अस्ट्रेलिया र स्कटल्याण्ड रहेका छन्। 

नेपालले पहिलो खेल माघ ५ मा बङ्गलादेशसँग खेल्ने छ। नेपालले दोस्रो खेल माघ ७ मा स्कटल्याण्डसँग तथा तेस्रो खेल माघ ९ मा अस्ट्रेलियासँग खेल्ने तालिका छ। 

पुष २१, २०८१ आइतबार ०८:५०:५२ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।