पैसा लिन जान्छु भनेर हिँडेका थिए इँटा व्यवसायी प्रसाईं, ४ दिनपछि उखुबारीमा गाडेको अवस्थामा शव भेटियो
काठमाडौं : सर्लाहीको हरिवनमा छ दिनदेखि बेपत्ता एक पुरूषको हत्या गरेर गाडेको अवस्थामा शव फेला परेको छ।
हरिवन नगरपालिका-१० निवासी ३९ वर्षीय हरिप्रसाद प्रसाईंको हत्या गरी उखुबारीमा गाडेको अवस्थामा आज शव फेला परेको प्रहरीले जनाएको छ।
उखुबारीमा गाडेको अवस्थामा फेला परेको शवको टाउकोमा चोट देखिएको जिल्ला प्रहरी कार्यालयका प्रवक्ता डिएसपी दीपक श्रेष्ठले जानकारी दिए।
मृतक प्रसाईं गत पुस १५ देखि बेपत्ता भएका थिए। पुस १५ को बिहान बरहथवा पैसा लिन जान्छु भनेर हिँडेका प्रसाईं साँझ अबेरसम्म पनि नफर्किएपछि परिवारले खोजी गरेका थिए। कतै फेला नपरेपछि भोलिपल्ट बिहान इलाका प्रहरी कार्यालय हरिवनमा निवेदन दर्ता गरेका थिए।
'खोजतलासको क्रममा उहाँले लगाएको जुत्ता फेला परेपछि प्रदेश प्रहरी कार्यालयबाट कुकुर ल्याएर खोजी गरेका थियौं। पुस १८ मा सोही वडाको नहर छेउमा मोटरसाइकल र च्यातिएको फोटोसमेत फेला परेको थियो। त्यसपछि १९ गते घटनास्थलको केही किलोमिटरको दूरीमा पर्स फेला परेपछि खोजी तीव्र पारिएको थियो। आज उखुबारीमा शव गाडेको अवस्थामा फेला परेको हो, डिएसपी श्रेष्ठले भने।
उनका अनुसार प्रादेशिक अस्पतालका चिकित्सक र जिल्लाका सुरक्षा अधिकारी, सरकारी वकिलसमेतको उपस्थितिमा खाल्डो खनेर शव निकालेको हो। प्रारम्भिक मुचुल्का पछि शव परीक्षणका लागि प्रादेशिक अस्पताल मलङ्गवा पुर्याइएको प्रहरीले जनाएको छ।
घटनामा संलग्न भएको आशङ्कामा प्रहरीले केही व्यक्तिलाई पक्राउ गरेर अनुसन्धान सुरु गरेको छ। अनुसन्धान कार्यमा बाधा पुग्ने भन्दै उनीहरूको पहिचान भने गोप्य राखिएको प्रहरीले जनाएको छ।
प्रसाईंको हत्या पछि गाउँ त्रासमा परेको छ। मृतक प्रसाईंले इँटा भट्टा सञ्चालन गर्दै आएका थिए।
पुष २०, २०८१ शनिबार २०:४९:०० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
