अक्सिजनबिनै विश्वका आठ हजार मिटर अग्ला सबै शिखर आरोहण गर्ने पहिलो नेपाली मिङ्मा स्वदेश फर्किए
काठमाडौं : कीर्तिमानी पर्वतारोही मिङ्मा जी शेर्पा स्वदेश फर्किएका छन्। विश्व कीर्तिमानी माउन्टेन गाइड मिङ्मा जी शेर्पा अक्सिजन बिना नै आठ हजार मिटर अग्ला १४ वटा हिमालको सफल आरोहण गरि शुक्रबार स्वदेश फर्किए।
स्वदेश फर्किएका उनलाई नेपाल पर्वतारोहण संघले त्रिभुवन अन्तराष्ट्रिय विमानस्थलमा भव्य स्वागत गरेका छन्। शेर्पाले अक्सिजनको सहायताबिना विश्वका आठ हजार मिटर अग्ला सबै शिखर आरोहण गर्ने पहिलो नेपालीको रेकर्ड बनाएका छन्।
शेर्पाले सातवटै महादेशका सर्वोच्च शिखर आरोहण पनि गरेका छन्।
स्वदेश फर्किएका जी शेर्पाले सञ्चारकर्मीहरूसँग कुरा गर्दै सानैदेखिको नेपाललाई विश्वसामु चिनाउने आफ्नो सपना पूरा भएको बताए। उनले सातवटै महादेशको हिमालहरू सफलतापूर्वक आरोहण गर्न सक्दा खुसी भएको बताए।
उनले भने, ‘मेरो एउटा सपना थियो, नेपाललाई विश्वसामु चिनाउने। आज यो लगभग पूरा भएको छ। हामी नेपालीहरू पनि विश्वसामु चिनिनुपर्छ। विश्वको जुनसुकै देशमा भए पनि हामी नेपाली पनि हरेक क्षेत्रमा अब्बल छौं भन्ने प्रमाणित गर्न सक्नुपर्छ।’
उनले बिना अक्सिजन आरोहण गर्न धेरै अप्ठ्यारो नभएको बताए।
पुष १९, २०८१ शुक्रबार १४:३९:३२ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
