नयाँ वर्षको अघिल्लो दिन एक युवकसँगै गौशालाको बागमती होटलमा बस्न गएकी युवती मृत भेटिइन्

काठमाडौं : काठमाडौंको गौशालास्थित बागमती होटलमा एक युवती मृत भेटिएकी छन्।

कागेश्वरी मनोहरा नगरपालिका घर भएकी सुस्मिता खड्का मृत अवस्थामा भेटिएको जिल्ला प्रहरी परिसर काठमाडौंका एसपी तथा प्रवक्ता नवराज अधिकारीले बताए।

नयाँ वर्षको अघिल्लो दिन उनीहरू त्यस होटलमा बस्न गएका थिए। भोलिपल्ट ती युवक होटलकै ताला बाहिरबाट लगाएर ‘केहीबेरमा आउँछु’ भन्दै निस्किएका थिए। तर, उनी फर्केनन्। 

त्यसपछि होटल सञ्चालकले प्रहरीलाई खबर गरेका थिए। स्थानीय जनप्रतिनिधिसहितको उपस्थितिमा बुधबार दिउँसो ताला फुटाएर हेर्दा सुस्मिता कोठामा मृत अवस्थामा भेटिएकी एसपी अधिकारीले बताए।

घटनाबारे उपत्यका अपराध अनुसन्धान कार्यालय र जिल्ला प्रहरी परिसर काठमाडौंले अनुसन्धान गरिरहेको छ। 

फरार युवकको पहिचान भइसकेको र पक्राउ गर्न मात्रै बाँकी रहेको प्रहरीले जनाएको छ। 

प्रहरीले घटनास्थलको मुचुल्का गरी पोष्टमर्टमको लागि शव टिचिङ अस्पताल पठाइएको छ।

पुष १८, २०८१ बिहीबार १५:३५:०६ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।