मेलबर्न एयरपोर्टमा अष्ट्रेलियाकी पत्रकारसँग कोहलीको लफडा

एजेन्सी : भारतीय क्रिकेट टोलीका ब्याट्सम्यान विराट कोहलीले अस्ट्रेलियाको मेलबर्न एयरपोर्टमा आफ्नो परिवारको फोटो खिचेकोमा कडा आपत्ति जनाएका छन्।

बिहीबार विराट कोहली आफ्नो परिवारसँग मेलबर्न एयरपोर्टमा थिए, त्यही समयमा एक महिला पत्रकारले उनको परिवारको फोटो खिचेकी थिइन्। यही विषयमा कोहलीले कडा आपत्ति जनाएका हुन्।

मेलबर्न एयरपोर्टमा अस्ट्रेलियाली रिपोर्टर फास्ट बलर स्कट बोल्याण्डसँग कुरा गर्दै गर्दा कोहली परिवारसहित त्यहाँबाट गइरहेका थिए।

महिला पत्रकारप्रति आपत्ति जनाउँदै विराट कोहलीले आफ्नो गोपनीयताको सम्मान गर्न अनुमतिबेगर तस्बिर खिच्न नसक्ने विषय कडा रूपमा राखेका थिए।

तर, ती पत्रकारले अष्ट्रेलियाको कानूनबारे जानकारी दिँदै सार्वजनिक स्थानमा सार्वजनिक व्यक्तिको तस्बिर खिच्न सक्ने बताइन्। त्यसपछि कोहली आक्रोशित मुद्रामा बाहिर निस्किएका थिए।

भारत र अष्ट्रेलियाबीचको चौथो टेष्ट खेल २६ डिसेम्बरदेखि मेलबर्नमा सुरु हुँदैछ। बोर्डर गावस्कर ट्रफीका तीन टेस्ट खेलमा विराट कोहलीको बिर्सनलायक छ।

पुष ५, २०८१ शुक्रबार ०९:५६:०५ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।