कप्तान पूजाले दिलाइन् नेपाललाई पहिलो ओभरमै सफलता, पानी परेर रोकियो खेल
काठमाडौं : एसीसी यु१९ महिला एसिया कपको सुपर फोरमा नेपालले पहिलो सफलता हात पारेको छ।
टस जितेर पहिला बलिङ रोजेकी नेपालकी कप्तान पूजा महतोले टिमलाई पहिलो सफलता दिलाएकी हुन्।
पहिलो ओभरको पाँचौं बलमा कप्तान महतोले श्रीलंकाकी ओपनर हिरुनी हन्सिकालाई विकेटकिपर अलिसा कुमारी यादवबाट क्याचआउट गराएकी हुन्।
त्यसपछि क्रिजमा आएकी लिमान्सा थिलकरत्नेले पहिलो ओभरको अन्तिम बल फेस गरिन्।
पहिलो ओभर सकिनेबित्तिकै पानी परेपछि अहिले खेल स्थगित भएको छ।
समूह चरणको खेलमा बंगलादेशसँग पराजित भएको श्रीलंकाले मलेसियालाई पराजित गरेर सुपर फाेरमा स्थान बनाएको हो।
एक खेल अगाडि नै सुपर फोरमा पुगेको नेपालले समूह चरणको अन्तिम खेलमा भने भारतसँग अंक बाँडेको थियो। वर्षाले खेल प्रभावित भएपछि भारत र नेपालले एकएक अंक बाँडेका हुन्।
यो नतिजासँगै समूह ‘बी’ मा समान ३ अंक रहे पनि नेट रनरेटका भारत विजेता र नेपाल उपविजेता बन्दै सुपर फोरमा पुगेका हुन्।
समूह ‘बी’ मा नेपालसहित भारत र पाकिस्तान सहभागी थिए। एसिया कपको समूह ‘ए’ मा श्रीलङ्का, बङ्गलादेश र मलेसिया छन्।
सुपर फोरको अर्को प्रतिस्पर्धामा नेपाल शुक्रबार बंगलादेशसँग भिड्नेछ। सुपर चारका शीर्ष दुई टिमले फाइनल खेल्नेछन्। फाइनल भिडन्त आइतबार बिहान हुनेछ।
पुष ४, २०८१ बिहीबार १२:०७:२६ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
