एक खेलअगावै प्लेअफ दौडबाट बाहिरियो रोहितको लुम्बिनी

काठमाडौं : नेपाल प्रिमियर लिग एनपिएल अन्तर्गत लुम्बिनी लायन्स प्लेअफ दौडबाट बाहिरिएको छ। 

आज भएको ‘लो स्कोरिङ’ खेलमा काठमाण्डु गुर्खाजसँग १८ रनले हारेसँगै रोहित पौडेल कप्तान रहेको लुम्बिनी प्लेअफमा नपुग्ने निश्चित भएको हो। तथापि उसले अझै एक खेल खेल्न बाँकी छ। 

६ खेल खेलिसकेको लुम्बिनीले जम्मा १ खेल जित्दा ५ खेलमा हार व्यहोरेको छ। 

काठमाण्डुले दिएको एक सय ४ रनको लक्ष्य पछ्याएको लुम्बिनी १९.२ ओभरमा अलआउट भएको हो। लुम्बिनीले सबै विकेट गुमाउँदै ८५ रन मात्रै बनाउन सफल भएको छ। 

टियु क्रिकेट मैदानमा काठमाण्डुका कप्तान करण केसीले टस जितेर ब्याटिङ रोजेका थिए। लिग चरणमा कर्णाली याक्ससँग खेल्न बाँकी लुम्बिनीले चितवन राइनोजलाई ३३ ले मात्रै हराउन सक्यो। 

बाँकी खेलमा हार बेहोरेको लुम्बिनी प्रतियोगिताबाट बाहिरिने पहिलो टोली बन्यो। 

यता, काठमाण्डुले भने दोस्रो जित हासिल गरेको छ। काठमाण्डुले यसअघि कर्णाली याक्सलाई तीन विकेटले पराजित गरेको थियो।

मंसिर २६, २०८१ बुधबार १६:३३:५७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।