रुसको रक्षा बजेट एक सय २६ अर्ब डलर, कुल खर्चको ३२.५ प्रतिशत
एजेन्सी : रुसी संसद डुमाले सन् २०२५ को लागि एक सय २६ अर्ब अमेरिकी डलरको रक्षा बजेट स्वीकृत गरेको छ।
यो कुल सरकारी खर्चको ३२.५ प्रतिशत हो। सीएनएनका अनुसार यो रकम गत वर्षको रक्षा बजेटभन्दा २८ अर्ब डलर बढी हो।
यो नयाँ तीन-वर्षीय बजेटले सन् २०२६ र २०२७ को लागि सैन्य खर्चमा पनि थोरै कटौती गर्ने अनुमान गरेको छ। डुमाका दुवै सदनबाट बजेट स्वीकृत भएको छ।
रुसले विगत दुई वर्षदेखि लगातार आफ्नो रक्षा बजेट बढाउँदै आएको छ। यसको असर रुसी अर्थतन्त्रमा पनि परेको छ। देशमा मुद्रास्फीति निकै उच्च छ र कम्पनीहरूले श्रमिक अभावको सामना गरिरहेका छन्।
स्थिति ह्यान्डल गर्न, रूसी केन्द्रीय बैंकले अक्टोबरमा ब्याज दर बढाएर २१ प्रतिशतमा पुर्यायो, जुन दश वर्षमा उच्चतम हो।
रुसमा नयाँ सैनिक अभाव, युक्रेनले सहयोग गरिरहेको छ
युद्धका कारण रुसको अर्थतन्त्र र जनसंख्यामा लगातार दबाब बढिरहेको छ।
युक्रेनभन्दा ठूलो जनसङ्ख्या भए पनि रुसले नयाँ सैनिक भर्ती गर्न कठिनाइको सामना गरिरहेको छ।
अर्कोतर्फ युक्रेनले पश्चिमी मुलुकबाट निरन्तर आर्थिक र रणनीतिक सहयोग पाइरहेको छ।
जर्मन चान्सलर ओलाफ स्कोल्जले सोमबार युक्रेनलाई करिब छ सय ८४ मिलियन डलर बराबरको सैन्य उपकरण उपलब्ध गराउने घोषणा गरेका छन्।
दोस्रो विश्वयुद्धपछि युरोपमा सबैभन्दा ठूलो द्वन्द्व
यो रुस–युक्रेन युद्ध दोस्रो विश्वयुद्धपछिको युरोपमा सबैभन्दा ठूलो द्वन्द्व हो।
मस्कोले युक्रेनको धेरै क्षेत्रहरूमा कब्जा गरेको अवस्थामा गत अगस्टमा युक्रेनले कुर्स्कमा अचानक आक्रमण गर्दै रूसको ठूलो क्षेत्र कब्जा गरेको थियो।
तर, अहिले रुसले युक्रेनी कब्जाबाट ४० प्रतिशत जमिन फिर्ता लिएको छ।
दुवैले एकअर्कालाई घातक मिसाइलले आक्रमण गरिरहेका छन्। युक्रेनले बेलायतबाट ल्याएको स्टर्म स्याडो मिसाइलले आक्रमण गर्दा रुसले ब्यालेस्टिक मिसाइलले जवाफ दिएको थियो।
मंसिर १७, २०८१ सोमबार १९:५६:०१ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
