एकीकृत समाजवादीले खाता खोल्यो, गढीमाई-८ मा २४ मतको झिनो अन्तरले एमालेलाई हरायो
चन्द्रपुर : रौतहटको गढीमाई नगरपालिका वडा-८ को वडाध्यक्ष पदमा एकीकृत समाजवादीका उम्मेदवार बजरङ्गीप्रसाद यादव विजयी भएका छन्।
हिजो सम्पन्न उपनिर्वाचनमा उनले छ सय ५५ मत प्राप्त गरेका थिए। उनका निकटतम प्रतिस्पर्धी एमालेका जिउतीदेवी यादवले छ सय ३१ मत ल्याए।
त्यहाँ तेस्रो भएको नेपाली कांग्रेसका सुबोधकुमार यादवले छ सय १७ मत ल्याउँदा जसपा नेपालका सन्देशप्रसाद यादवले दुई सय ५८ मत ल्याएको जिल्ला निर्वाचन कार्यालय रौतहटका प्रमुख छोटेलाल दासले जानकारी दिए।
यो समाचार तयार गर्दासम्म उपनिर्वाचनको परिमाण आउने क्रम जारी छ। यतिबेलासम्म एकीकृत समाजवादीको यो पहिलो जीत हो।
यसअघिको निर्वाचनमा जनता समाजवादी पार्टी नेपालका रामाज्ञा यादव निर्वाचित भएका थिए। त्यसबेला एकीकृत समाजवादीका बजरंगी तेस्रो भएका थिए।
मंसिर १७, २०८१ सोमबार ०९:२०:३२ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
