एनपिएल उद्घाटन खेलको टिकट बेचिसकेर क्यानले टीयूका विद्यार्थीलाई खेल हेर्न ५० प्रतिशत छुट घोषणा गर्यो
काठमाडौँ : नेपाल प्रिमियर लिग हेर्न त्रिभुवन विश्वविद्यालय कीर्तिपुरका विद्यार्थीहरुले ५० प्रतिशत छुट पाउने भएका छन्। क्रिकेट एसोसिएसन अफ नेपालले शुक्रवार बेलुका विज्ञप्ति जारी गरेर यस्तो छुटको घोषणा गरेको हो।
एनपिएल मंसिर १५ देखि पौष ६ सम्म त्रिभुवन विश्वविद्यालय क्रिकेट मैदानमा आयोजना हुँदैछ। भोली शनिवारको उद्घाटन खेलका सबै टिकट विक्री भइसकेको क्यानको दाबी छ।
क्यानका अनुसार प्रतियोगिता अवधिभरका लागि त्रिभुवन विश्वविद्यालय क्रिकेट मैदान, कीर्तिपुरमा सञ्चालन हुने खेलहरूका लागि यस सङ्घ र त्रिभुवन विश्वविद्यालयबिच भएको सम्झौता बमोजिम हाल कायम गरिएको साधारण तर्फको टिकट खरिदमा विश्वविद्यालयमा अध्ययनरत सम्पूर्ण विद्यार्थीहरूको लागि ५० प्रतिशत छुट कायम गरिएको उल्लेख छ।
सो छुट उद्घाटनका दिन हुने खेलका लागि पनि हो या हैन विज्ञप्तिमा खुल्दैन। यस अगाडि नै क्यानले उद्घाटनको दिनको साधारण तर्फको सबै टिकट विक्री भइसकेको दाबी गरेको थियो।
मंसिर १४, २०८१ शुक्रबार २२:५६:५० मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
