एनपिएलका आठ मार्की खेलाडीको तारिफ गरेर थाकेनन् प्रधानमन्त्री ओली, कसलाई के भने?

काठमाडौं : प्रधानमन्त्री केपी ओलीले आज सुन्धारास्थित धरहरापरिसरमा नेपाल प्रिमियर लिग एनपिएलको ट्रफी सार्वजनिक गरे। 

त्यस अवसरमा प्रधानमन्त्री ओलीले गौरवशाली धरहराको काखमा एनपिएलको ट्रफी सार्वजनिक कार्यक्रमले खेलकुदमा नयाँ जाँगर पैदा गरेको जिकिर गरे। 

प्रधानमन्त्री ओलीले नेपाली क्रिकेट खेलाडी तथा एनपिएलका आठ टोलीकै मार्की खेलाडीको खुलेर प्रशंसासमेत गर्न भ्याए।

उनले सम्बोधनको क्रममा सुरुमै जनकपुर बोल्ट्सका कप्तान आसिफ शेखको प्रशंसा गरे। 

उनले शेखले स्पोर्टम्यानसिप देखाउँदै आयरल्यान्डका खेलाडीलाई रनआउट नगरेको श्रव्यदृश्य आफूले पनि हेरेको उल्लेख गर्दै उनलाई क्याप्टेन कुलको उपनाम दिनुपर्ने बताए ।  

प्रधानमन्त्री ओलीले भने, ‘जनकपुर बोल्ट्सका मार्की खेलाडी आसिफ शेखले स्पोर्टम्यानसिप देखाउँदै आयरल्यान्डका खेलाडीलाई रनआउट नगरेको त्यो भाइरल श्रव्यदृश्य मैले पनि हेरेको थिएँ। जनकपुरझैँ शान्त स्वभाव कायम रहोस्। आसिफ शेखलाई क्याप्टेन कुल, शान्त भनेर उपनाम दिए पनि हुन्छ जस्तो लाग्छ।’

प्रधानमन्त्री ओलीले काठमाडौं गुर्खाजका मार्की खेलाडी करण केसीलाई ‘भ्यालेन्टाइन बोय’ सम्बोधन गरे। करणले राजधानीको नाम राख्ने आफूले आशा लिएको उनले जिकिर गरे। 

‘काठमाडौं गुर्खाजका कप्तान करण केसीलाई भ्यालेन्टाइन बोय भनेर सम्बोधन गर्ने कुरा थाहा पाएको थिएँ,’ उनले भने, ‘उनले राजधानीको नाम राख्ने आशा लिएको छु।’ 

सम्बोधनको क्रममा प्रधानमन्त्री ओलीले पोखरा एभेन्जर्सका मार्की खेलाडी कुशल भुर्तेललाई विश्वले नै बलर हुन् कि ब्याटर छुट्याउनै नसकेको बताए। उनले यसपटक ९९ रनमा आउट हुन् नपरोस् भन्दै शतक हान्न शुभकामना दिए। 

‘पोखरा एभेन्जर्सका मार्की खेलाडी कुशल भुर्तेल बलर हुन् कि ब्याटर छुट्याउनै गाह्रो हुने उनको कौशल छ। विश्वले नै छुट्याउन सकिरहेको छैन जस्तो लाग्छ। मैले मात्रै होइन,’ कुशलको प्रशंसा गर्दै प्रधानमन्त्री ओलीले भने, ‘यसपटक ९९ रनमा आउट हुन नपरोस्। शतक हान्नु भन्ने मेरो शुभकामना छ।’

प्रधानमन्त्री ओलीले चितवन राइनोजलाई आफूले ‘गैँडाज’ भन्ने बताए। चितवन राइनोजका मार्की खेलाडी कुशल मल्लको छक्का हान्ने शैली मनपर्ने उल्लेख गर्दै उनले आखिर चितवन गैँडाजका कप्तान हो नि भन्दै प्रशंसा गरे।

‘हाम्रा साथीहरूले चितवन राइनोज भन्नुभएको छ, म चितवन गैँडाज भन्छु,’ उनले भने, ‘चितवन राइनोज अर्थात् गैँडाजका कप्तान कुशल मल्ल हेर्दा अल्लि सानो-सानो लाग्ने। ज्यानमा ताकत बोकेर छक्का हान्ने शैली साह्रै मनपर्छ।’ 

लुम्बिनी लायन्सका मार्की खेलाडी रोहितकुमार पौडेलको नाम सुन्दै गर्व लाग्ने भन्दै प्रधानमन्त्री ओलीले उनको प्रशंसा गरे। जसले जिते पनि रोहितलाई फाइदा हुने भन्दै प्रधानमन्त्री ओलीले नेपाली क्रिकेटका कप्तान भएको नाताले उनले जितेकै हुने धारणा राखे। 

‘लुम्बिनी लायन्सका रोहित पौडेलको नाम सुन्यो कि मलाई गर्व लाग्छ। रोहितको कप्तानीले लुम्बिनीको भावना मैदानमा देख्नेछ। जसले जिते पनि रोहितलाई फाइदा छ, आखिर देशले जित्छ र नेपाली क्रिकेटका कप्तान भएको नाताले उनले जितेकै हुनेछन्,’ प्रधानमन्त्री ओलीले भने। 

विराटनगर किङ्सका मार्की खेलाडी सन्दीप लामिछाने नेपाली क्रिकेटको ब्रान्ड एम्बासडरजस्तै भएको प्रधानमन्त्री ओलीले बताए। उनले बिबिएलदेखि आइपिएलसम्म सन्दीपको बलले धेरै ब्याट्सम्यानलाई नाच्न बाध्य पारेको सुनाए। 

‘विराटनगर किङ्सका सन्दीप लामिछाने त हाम्रो क्रिकेटको ब्रान्ड एम्बासडरजस्तै हुनुभयो । बिबिएलदेखि आइपिएलसम्म सन्दीपको बलले धेरै ब्याट्सम्यानलाई नाच्न बाध्य पारेको छ,’ उनले भने, ‘त्यसैले त मैले भनेको थिएँ, नेपालीले चान्स पायो भने गर्छ।’

कर्णाली याक्सका मार्की खेलाडी सोमपाल कामीका योरकरलाई भुल्न नसकिने प्रधानमन्त्री ओलीले बताए। उनले सोमपालले कर्णालीको चिसो पानीको ताकत मैदानमा देखाउने उल्लेख गर्दै अर्को टी-२० विश्वकप खेल्ने तयारीमा राम्ररी जुट्न सुझाव दिए। 

‘कर्णाली याक्सका सोमपाल कामीका ती योरकरलाई कसले भुल्न सक्छ र ? सोमपालले कर्णालीको चिसो पानीको ताकत मैदानमा देखाउनेछन्,’ प्रधानमन्त्री ओलीले भने, ‘नेपाललाई अर्को टी-२० विश्वकप खेल्ने तयारीमा राम्ररी जुट्न मेरो सल्लाह छ।’

प्रधानमन्त्री ओलीले सुदूरपश्चिम रोयल्सका मार्की खेलाडी दीपेन्द्रसिंह ऐरीलाई बाघको संज्ञा दिए। उनले ऐरीको ६ छक्काको कीर्तिमान आफूलाई स्मरण रहेको उल्लेख गर्दै यस्ता थुप्रै कीर्तिमान बताउनसमेत शुभकामना दिए।

‘अन्तिममा हिरोको पालो आउँछ, मेरो फेभरेट नै जस्तो भनौँ। नेपाली क्रिकेटका बाघ दीपेन्द्रसिंह ऐरीको ६ छक्काको कीर्तिमान मलाई स्मरण छ,’ उनले भने, ‘एनपिएलमा यस्ता थुप्रै कीर्तिमान बनून्। सुदूरपश्चिम रोयल्सलाई पनि विशेष शुभकामना छ।’

पहिलो संस्करणको नेपाल प्रिमियर लिग एनपिएल यही मंसिर १५ देखि सुरू हुँदै छ। प्रतियोगिताका खेल कीर्तिपुरस्थित त्रिभुवन विश्वविद्यालयको क्रिकेट मैदानमा हुनेछन्।  

मंसिर १०, २०८१ सोमबार १७:२०:०० मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।