द ब्रिटिस कलेजमा करियर फेस्ट -२०२४ हुँदै, स्थानीय प्रतिभालाई अवसरसँग जोड्ने प्रयास

काठमाडौं : ब्रिटिस एजुकेशन ग्रुप अन्तर्गतको द ब्रिटिस कलेजमा करियर फेस्ट- २०२४ हुने भएको छ। ग्रोथ सेलर्सको सहकार्यमा २५ र २६ नोभेम्बरको दिन थाथापलीस्थित कलेज हातामा करियर फेस्टको आयोजना हुन लागेको हो।

देशभरका रोजगारदाता कम्पनी र रोजगारी खोजिरहेका व्यक्तिहरू फेस्टमा सहभागी हुनेछन्। कलेजमा अध्ययनरत विद्यार्थी, पूर्वविद्यार्थीमात्रै नभई सर्वसाधारण र शीर्ष कम्पनीहरूलाई एउटै स्थानमा ल्याई रोजगारीको अवसर प्रदान गर्ने, नेटवर्किङ बढाउने, र ज्ञान आदान-प्रदान गर्ने गतिशील मञ्चको रूपमा सेवा पुर्याउने कलेजले जनाएको छ।

५० भन्दा बढी राष्ट्रिय तथा बहुराष्ट्रिय कम्पनीहरूको सहभागिता रहने फेस्ट, रोजगारदाता तथा रोजगारीको खोजी गरिरहेका व्यक्तिहरूको लागि फलदायी हुने कम्पनीको विश्वास छ। 

फेस्टमा सहभागी हुने रोजगारदाता कम्पनीहरूले सो संस्थाको विभिन्न पक्षहरूको बारेमा जानकारी प्रदान गर्नेछन्। साथै, सो कम्पनीहरूले प्रत्यक्ष अन्तर्वार्ता लिई रोजगारीको अवसर समेत प्रदान गर्न सक्नेछन्। एउटै मञ्चबाट दुवै पक्षले फाइदा लिन सक्ने फेस्ट सरल र प्रभावकारी माध्यम भएको कलेजको विश्वास छ।

ब्रिटिस कलेजका डेप्युटी प्रिन्सिपल डा. प्याट्रिक म्याकक्रुडेनले नेपालमा रहेको ‘ब्रेन ड्रेन’को समस्या समाधान गर्नको लागि यो पहल महत्वपूर्ण हुने विश्वास व्यक्त गरे। 

‘रोजगारीको अवसर पाउन कठिन भइरहेकाले नेपालबाट क्षमतावान् व्यक्तिहरू पलायन भइरहेको छन्। करियर फेस्ट २०२४ ले स्थानीय प्रतिभा पहिचान गर्दै रोजगारीको अवसर चाहिएका व्यक्तिहरूलाई नेपालमै सन्तोषजनक काम प्रदान गर्नको लागि आयोजना गरिएको हो,’ प्रिन्सिपल म्याकक्रुडेनले भने। 

ग्रोथ सेलर्सका संस्थापक, मोहन ओझाले ब्रिटिस कलेजले आयोजना गर्न लागेको फेस्ट रोजगारी खोज्नेहरूलाई फलदायी हुने सुनाए। 

‘हामी सबै रोजगारी खोजिरहनुभएका व्यक्तिहरूलाई आवेदन दिन र कार्यक्रम दौरान आफ्नो लक्ष्यसँग मेल खाने कम्पनीहरूलाई भेट्नको निमन्त्रणा गर्दछौं,’ ओझाले भने। 

करियर फेस्ट केवल रोजगारी मेला मात्र नभई, एउटा व्यावसायिक विकास केन्द्र हो। फेस्टमा सहभागीहरूले सीभीबारेको कार्यशाला, करियर गाइडेन्सका शत्रहरू, र मास्टरक्लासहरूमा पहुँच पाउनेछन्।  

कात्तिक २९, २०८१ बिहीबार २०:०८:५१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।