पूर्णबहादुरको सारङ्गी : व्यापारको मात्र हैन, ‘चोरी’को रेकर्ड पनि थपिँदै
काठमाडौं : नेपाली फिल्म इतिहासमा एकपछि अर्को रेकर्ड राख्दै गएको छ फिल्म ‘पूर्ण बहादुरको सारङ्गी’ ले। सर्वाधिक व्यापारको रेकर्ड बनिसक्यो। अर्को रेकर्ड नि थपिँदै गइरहेको छ ‘चोरी’को।
‘पूर्णबहादुरको सारङ्गी’को कथा आफ्नो सिर्जनाबाट चोरिएको आरोप लगाउनेको संख्या तीन पुगिसक्यो। यसमा उपन्यासकार, फिल्म लेखक अनि निर्देशकसम्म छन्।
उनीहरूले सामाजिक सञ्जालबाट आरोप लगाइरहे पनि कोही पनि कानूनी उपचारमा गइसकेका छैनन्। पहिलो पटक चोरीको आरोप लाग्दा निर्माण टिमका सदस्य सामाजिक सञ्जालमै रियाक्टिभ देखिएका थिए।
सार्वजनिक रूपमै चोरी जस्तो गम्भीर आरोप लगाउनेहरू कानूनी उपचारमा जान सक्रिय नदेखिनु आफैँमा शंका लायक त हो नै, यदि आरोप गलत हो भने फिल्म निर्माण टिम पनि यति गम्भीर आरोपबाट मुक्त हुन कानूनी उपचारमा जान सक्छ नै।
तर, फिल्म निर्माण टिम पनि मौन देखिएको छ। यसले उसलाई पनि शंकाको घेरा बाहिर राख्न सकेको छैन।
अब आरोपहरुबारे चर्चा गरौँ। पहिलो पटक आफ्नो उपन्यासको मुख्य प्लटहरू नै चोरी गरेर फिल्ममा राखेको आरोप लगाए डा. शिवशंकर बस्यालले। उनले फेसबुकमा निकै लामो प्रतिक्रिया लेख्दै आफ्नो उपन्यास संग्रामपुरबाट कथा चोरिएको दाबी गरे।
निर्माण पक्षले प्रारम्भमा फिल्म सफल भएपछि विवादमा पारेर आफ्नो उपन्यास चर्चामा ल्याउने प्रपन्च भनेर गम्भीर आरोप लगाए। गुमनाम उपन्यास एकाएक खोजीको विषय बन्यो। बजारमा उपन्यास थिएन। अच्युत घिमिरेले अडियो बुक बनाएर सार्वजनिक गरे।
अडियो बुक सुन्दा डा बस्यालले सामाजिक सञ्जालमा जुन बुँदाहरू उल्लेख गरेर आरोप लगाएका थिए ती प्रसङ्ग भेटिनुका साथै पात्रको पृष्ठभूमि र मुल कथाबाहेक पूर्ण बहादुरकै कथा सुनेझैँ लाग्छ। यसले डा बस्यालको आरोप केवल आफ्नो उपन्यासलाई चर्चामा ल्याउन मात्र गरिएको भन्ने फिल्म निर्माण टिमको तर्कमा दम देखिएन।
तर, अहिले यी दुवै पक्ष एकाएक मौन छन्। न बस्याल थप प्रक्रियामा गएका छन् न त निर्माण टिमका कुनै सदस्य यसबारे बोल्न नै इच्छुक छन्।
जानकारका अनुसार बस्यालसँग सम्पर्क गरेर समस्या समाधान फिल्मका निर्माण टिम सक्रिय भएका थिए। उनीहरूले फिल्मको कथासँग मिलेको भनिएको उपन्यासको अंश माग्दा डा बस्यालले एक निर्मातालाई पठाएको बताएका थिए।
त्यसपछि यो समाधान गर्न बासुरी फिल्मस्का रामबाबु गुरुङ आफैँ खटिएका थिए। कतै भित्रभित्रै सेटल भयो कि! दुबै पक्ष जानुन्।
अब दोस्रो आरोप।
यहीबीचमा अर्का फिल्म निर्देशक तथा लेखक सचिन घिमिरेले सामाजिक सञ्जालमै फिल्मको मुख्य प्लट आफ्नो फिल्म ‘दियाली’को रहेको दाबी गरे।
फिल्मको युट्युब लिंकसहित उनले लेखे, ‘अहिलेको लोकप्रिय चलचित्रमा १२ वर्ष अगाडि हामीले निर्देशन गरेको चलचित्र दियालीको मुख्य प्रसङ्ग नै हुबहु मिल्नुलाई हामीले एक दुर्लभ संयोग मात्र मानेका छौँ।’
यसपछि दुबै पक्ष मौन।
त्यसपछि एकाएक बिहीबार अर्का फिल्म लेखक अजित लामिछानेले लामै प्रतिक्रिया लेखे फेसबुकमा।
फिल्म ‘पूर्णबहादुरको सारङ्गी’का लेखक तथा निर्देशक सरोज पौडेललाई दुई वर्ष अगाडि आफूले आफ्नो फिल्म ‘लाज’को कथा सुनाएको प्रसङ्ग उल्लेख गर्दै उनले आरोप लगाए, ‘मेरो चलचित्र लाजको थिम र केहि प्लट चोरिएको पाएँ।’
उनले सरोजलाई सुनाएको कथा र केही प्लटलाई सर्लक्क टिपेर ‘पूर्ण बहादुरको सारङ्गी’मा हालिएको गम्भीर आरोप लगाए।
‘फरक यत्ति हो, तराईको कथालाई पात्र परिवर्तन गरी पहाडमा लगिएको छ। तराईमा छोराको लागि सङ्घर्ष गर्ने भुइँपात्र थारू बल्लिलाई पहाडमा लगेर सारङ्गी रेट्ने पूर्णबहादुर बनाइएको छ। उता पहाडमा गणतन्त्र जिन्दावाद भनिन्छ, यता तराईमा मधेश आन्दोलन जिन्दावाद भनिन्छ।’
उनले ‘लाज’लाई १० वर्ष अगाडि छोटो फिल्मको रूपमा बनाएको र कोरियाको बुसान फिल्म फेस्टिभलमा प्रिमियर भएको लेखेका छन्।
‘कथाकार र निर्देशक भनिएका सरोज पौडेल कति नैतिकवान मान्छे हुन त्यो म भन्न सक्दिन तर अरुको सिर्जना चोरेर आफ्नो बनाउने कथाकार/निर्देशक सरोज पौडेललाई मैले के भन्ने?’, उनको प्रश्न छ।
लामिछानेको आरोपपछि फिल्मका निर्माता विनोद पौडेलले सामाजिक सञ्जाल फेसबुकमा आफ्नो भनाइ राखेका छन्।
उनले लेखेका छन्, ‘एउटा फिल्म बनाको ३-४ जना मेरो हो भन्दै आका छन्।’
कात्तिक २८, २०८१ बिहीबार १२:२२:०४ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
