यु-१९ महिला विश्वकप क्रिकेट एसिया छनोट : चौथो खेलमा नेपालले थाइल्याण्डलाई हरायो

काठमाडौं : युनाइटेड अरब इमिरेट्स (युएई) मा जारी आइसीसी यु-१९ महिला टी-२० विश्वकप एसिया छनोटअन्तर्गत नेपाल आफ्नो चौथो खेलमा विजयी भएको छ। नेपालले आजको चौथो खेलमा थाइल्याण्डलाई एक सय ६ रनले पराजित गरेको हो। 

नेपाल र थाइल्याण्डबीचको खेल आज दिउँसो ३ः१५ बजे सुरू भएको थियो। नेपालले टस जितेर पहिला ब्याटिङ गर्दै निर्धारित २० ओभरमा नौ विकेट गुमाएर एक सय ३९ रन बनाएको थियो। एक सय ४० रनको लक्ष्य पछ्याएको थाइल्याण्डको पारी १६ ओभरमा ३३ रनमा समेटियो।

ब्याटिङ गर्ने क्रममा नेपालका लागि साना प्रविनले ५३, सावित्री धामीले २८ तथा सोनी पाख्रिनले १९ रन बनाइन्।  

एक सय ४० रनको लक्ष्य पछ्याउने क्रममा थाइल्याण्डका लागि कुनै पनि बयाटरले दोहरो अङ्कामा रन बनाउन सकेनन्। बलिङतर्फ नेपालका लागि कुशुम गोदारले तीन, रिया शर्मा र रचना चौधरीले दुई/दुई तथा पूजा महतोले एक विकेट लिइन्। 

गत बुधबारदेखि सुरू भएको प्रतियोगितामा नेपालले पहिलो खेल थाइल्याण्डसँग खेलेको थियो। उक्त खेलमा नेपालले थाइल्याण्डलाई ६७ रनको फराकिलो अन्तरले पराजित गरेको थियो। 

नेपालले आफ्नो दोस्रो खेल बिहीबार कुवेतसँग खेलेको थियो। त्यस खेलमा नेपालले कुवेतलाई एक सय आठ रनले हराएको थियो। 

यसैगरी शनिबार खेलेको तेस्रो खेलमा नेपाल युनाइटेड अरब इमिरेट्स (युएई)सँग १३ रनले पराजित भएको थियो। नेपालले आफ्नो पाँचौँ खेल अब मङ्गलबार कुवेतसँग खेल्ने छ। 

प्रतियोगितामा आयोजक युएईसहित नेपाल, कुवेत र थाइल्याण्ड सहभागी छन्। प्रत्येक टोलीले एकअर्कासँग दुई/दुई खेल खेल्ने छन्। सहभागी चार टोलीमध्ये शीर्ष स्थान हासिल गर्ने टोली आइसीसी यु-१९ महिला टी-२० विश्वकपका लागि छनोट हुनेछ। 

यु-१९ विश्वकप क्रिकेट प्रतियोगिता अर्को वर्ष जनवरीमा मलेसियामा आयोजना हुँदैछ। 

कात्तिक २५, २०८१ आइतबार १८:५८:१७ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।