‘ह्रस्व दीर्घ’को ट्रेलरमा ब्रह्मानन्दम्को स्वर बदलियो, देखियो सरप्राइजको सङ्केत

काठमाडौँ : रिलिज मितिदेखि टिजरसम्म आइपुग्दा पनि फिल्म ह्रस्व दीर्घको निर्माण टिमले जस पाएनन्। रिलिज मिति सरेको सर्यै गर्दा कतै फिल्म नै बन्दैन कि क्या हो भन्ने शङ्का नदेखिएको हैन। किनकि फिल्ममा अनुबन्ध भएका भनिएका दक्षिण भारतीय कलाकारहरू नै त्यस्तै हाई प्रोफाइलका थिए।

रिलिज मिति तोकियो कात्तिक ३०। सँगै आयो टिजर। दक्षिण भारतीय फिल्मका उम्दा कलाकारको अभिनय रहेको फिल्मको टिजरले साउथ फिल्मकै झल्को दिने नै भयो। केही क्लिप अर्को फिल्मसँग मिल्दा लौ कपी पो गरेछन् जस्तो नदेखिएको पनि हैन। टिजरमा राखिएको ब्रह्मानन्दम्को नेपाली स्वरै मिलेन भनेर निकै आलोचना पनि भयो।

यी सबै शङ्का अनि उपशङ्का मेट्दै अनि आलोचना भएको ब्रह्मानन्दम्को नेपाली स्वर सुधार्दै बुधवार फिल्मको ट्रेलर सार्वजनिक गर्यो निर्माण टिमले। ब्रह्मानन्दम्सँगै देखिएका छन् रविन्द्र झा

काठमाडौँको राइजिङ मलमा पत्रकार सम्मेलन गरेर सार्वजनिक गरिएको ट्रेलरमा समेटिएको दृश्यले फिल्म धार्मिक मठमा बस्ने पात्रहरूको प्रेमकथामा आधारित झैँ देखाएको छ। प्रेम सम्बन्ध, त्यसले ल्याउने उतारचढावमा धार्मिक विश्वासहरु मिसिएको संकेत देखियो ट्रेलरमा।

ट्रेलरमा फिल्मका मुख्य कलाकार नीता ढुङ्गाना र हरिहर अधिकारीबीचको प्रेमको उतारचढाव समेटिएको थियो। ट्रेलरमा दक्षिण भारतीय कलाकारसँगै नेपाली कलाकारहरू विपना थापा, रेखा थापा, गरिमा शर्मा, सरोज खनाललाई समेत स्थान दिइएको छ। फिल्मको ट्रेलरमा सरोज खनालको न्यारेसन राखिएको छ।

केही दृश्य खिच्ने अनि सम्पादनको काम समेत भारतको मुम्बईमा गरिएको फिल्मको ट्रेलरमा समेटिएका दृश्य भव्य देखिएको छ। फिल्मको नाम किन ह्रस्व दीर्घ राखियो भन्ने सङ्केत पनि ट्रेलरमा समेटिएको छ।

नेपाल अनि भारतमा समेत एकै पटक रिलिज गर्ने रणनीति अनुसार हुनसक्छ फिल्मको फ्लेवर भने पुरै दक्षिण भारतीय फिल्मकै देखिन्छ। तर नेपाली दर्शकले दक्षिण भारतीय फ्लेवर स्विकारिसकेकाले ट्रेलर अनुसारकै फिल्म बनेको हो भने १२ गाउँ अनि पूर्णबहादुरको सारङ्गीपछिको सरप्राइज बन्न सक्छ यो फिल्म। निर्माण टिमका अनुसार फिल्म नेपालीसँगै, तेलुगु र हिन्दी भाषामा समेत रिलिज हुँदैछ।

कात्तिक २१, २०८१ बुधबार २०:५४:४१ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।