लुम्बिनीलाई हराउँदै वाइवाइ यु-१९ राष्ट्रिय क्रिकेटको उपाधि सुदूरपश्चिमले जित्यो
विराटनगर : विराटनगरमा जारी नरेश श्रेष्ठ मेमोरियल वाइवाइ पुरुष यु-१९ राष्ट्रिय एक दिवसीय क्रिकेट प्रतियोगिताको उपाधि साविक विजेता सुदूरपश्चिम प्रदेशले हासिल गरेको छ। बैजानाथपुरको गिरिजाप्रसाद कोइराला खेल मैदानमा आज भएको फाइनल खेलमा सुदूरपश्चिमले लुम्बिनी प्रदेशलाई ८ रनले पराजित गर्दै उपाधि रक्षा गरेको हो।
यसअघि सन् २०२२ मा त्रियू क्रिकेट मैदानमा भएको फाइनल खेलमा सुदूरपश्चिमले लुम्बिनीलाई नै पराजित गरी उपाधि जितेको थियो। जितसँगै बिजेता टोलीले दुई लाख रूपैयाँसहित ट्रफी तथा उपविजेता लुम्बिनीले एक लाख रूपैयाँसहित ट्रफी हात पारे।
टस जितेर ब्याटिङ गरेको सुदूरपश्चिमले निर्धारित ५० ओभरको खेलमा ३७ दशमलव ३ बलमा सबै विकेट गुमाई एक सय २७ रनको योगफल बनायो। सुदूरका लागि अविशेक थापाले २९ रन बनाउँदा नरेन भट्टले २७ रन, नरेन राउदले १५ रन, राजेश एयेर १४ रन र दीपक रोकयाले ११ रनको योगदान दिए।
लुम्बिनीका सन्तोष यादवले ५ विकेट लिए। उनले १० ओभरमा २ मेडन राख्दै २८ रन दिए। त्यस्तै, रमेश कुर्मीले ३ विकेट र शिव कुमार १ विकेट लिए।
एक सय २८ रनको लक्ष्य पाएको लुम्बिनीले ४३ दशमलव १ बलमा सबै विकेट गुमाइ एक सय १९ रन मात्र बनाउन सक्यो। लुम्बिनीका आकाश त्रिपाठीले २२ रन बनाउँदा शिव कुमारले २० रन, विजय कोहरले १९ रन, समिर अलीले १८ रन र सन्तोष यादवले १२ रनको योगदान दिए।
सुदूरपश्चिमका प्लेयर अफ द म्याच हेमन्त धामीले ४ विकेट लिँदा सचिन भट्ट र नरेन साउदले २/२ विकेट लिए।
प्रतयोगिताको उत्कृष्ट खेलाडी लुम्बिनीका सन्तोष यादव घोषित भए। यादव उत्कृष्ट बलरसमेत भए। उत्कृष्ट ब्याटर कोशीका सोनु अन्सारी घोषित भए।
उत्कृष्ट खेलाडीले नगद ५० हजार रूपैयाँका साथ ट्रफी तथा उत्कृष्ट ब्याटर र बलरले जनही नगद २५ हजार रूपैयाँसहित ट्रफी हात पारे। प्लेयर अफ द म्याच सुदूरका कप्तान हेमन्त धामीले पाएको नगद तीन हजार पुरस्कार ग्राउण्ड स्टाफलाई वितरण गरे।
विजयी तथा अन्य खेलाडीलाई कोशी प्रदेशका पूर्वमूख्यमन्त्री केदार कार्की, क्यानका केन्द्रीय उपाध्यक्ष रोशन सिंह, कोशी प्रदेश क्रिकेट सङ्घका अध्यक्ष सर्वजित पाण्डे र मोरङ जिल्ला क्रिकेट सङ्घका अध्यक्ष महमद बाबुलगायतले पुरस्कार तथा प्रमाणपत्र वितरण गरे।
कात्तिक २०, २०८१ बुधबार २०:३२:२९ मा प्रकाशित
उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।
