यु१९ राष्ट्रिय क्रिकेटको फाइनल आज, उपाधिका लागि लुम्बिनी र सुदूरपश्चिम भिड्दै

काठमाडौं : नरेश श्रेष्ठ स्मृति यु१९ राष्ट्रिय क्रिकेट प्रतियोगिताको उपाधिका लागि सुदूरपश्चिम र लुम्बिनी प्रदेशबीच खेल हुने भएको छ।

बुधबार विराटनगरमा रहेको गिरिजा प्रसाद कोइराला क्रिकेट मैदानमा साबिक विजेता सुदूरपश्चिम र लुम्बिनीबीचको फाइनल खेल बिहान नाै बजेबाट शुरू हुनेछ।

सिङ्गल राउण्ड रोबिनका आधारमा भएको प्रतियोगितामा सात टोलीको सहभागी थिए।लिग चरणको खेलमा शीर्ष स्थानमा रहेको सुदूरपश्चिम र दोस्रो स्थानको लुम्बिनीले फाइनलमा स्थान बनाएका हुन्।

सन् २०२२ मा भएको अघिल्लो संस्करणमा लुम्बिनी र सुदूरपश्चिमले नै फाइनल खेलेकामा सुदूरपश्चिम च्याम्पियन भएको थियो। लिग चरणको खेलमा सुदूरपश्चिम र लुम्बिनीले समान पाँच खेलमा जित हासिल गरेका थिए।

सुदूरपश्चिम प्रतियोगिताको पहिलो खेलमा पराजित भएको थियो। सुदूरपश्चिमले पछिल्लो ५ खेलमा लगातार जितका साथ फाइनलमा स्थान बनाएको हो।

सुदूरपश्चिम प्रदेश लिग चरणको पहिलो खेलमा लुम्बिनीसँग पराजित भएको थियो। लिग चरणमा लुम्बिनीले सुदूरपश्चिममाथि ४१ रनको जित हात पारेको थियो।

लिग चरणको सुरुवाती पाँच खेलमा लगातार जित हात पारेको लुम्बिनी मंगलवार भएको लिग चरणको अन्तिम खेलमा मधेश प्रदेशसँग पराजित भयो।

कात्तिक २०, २०८१ बुधबार ०७:५१:१८ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।