लेबनानबाट हिजबुल्लाहका वरिष्ठ सदस्य पक्राउ गरेको इजरायली सेनाको दाबी

एजेन्सी : इजरायली सेनाले उत्तरी लेबनानी ब्याट्रोन शहरमा हिजबुल्लाहका एक वरिष्ठ सदस्यलाई पक्राउ गरेको दाबी गरेको छ।

इजरायली सेनाका अनुसार उनीहरूले हिजबुल्लाहका एक वरिष्ठ सदस्यलाई शुक्रबार ब्याट्रोनमा नौसेना आक्रमणमा पक्राउ गरेका हुन्।

इजरायली सेनाका एक वरिष्ठ अधिकारीले भने, ‘हामीले विशेष अपरेशनको एक भागको रूपमा हिजबुल्लाह सदस्यलाई पक्रेर इजरायली क्षेत्रमा लगेका छौँ।’

हाल हिजबुल्लाहले इजरायली सेनाको दाबीबारे कुनै पनि प्रतिक्रिया दिएको छैन।

लेबनानको सरकारी मिडियाका अनुसार अज्ञात सैन्य बलहरूले बिहानै समुद्र तट नजिकैको एउटा भवनमा छापा मारेका थिए।

भवनबाट बाहिरिने क्रममा उनीहरूले एक व्यक्तिलाई समातेर स्पीडबोटको सहायताले छाडेको बीबीसीले जनाएको छ।

यो घटनापछि लेबनानी प्रधानमन्त्री नजिब मिकातीको कार्यालयले परराष्ट्र मन्त्रालयलाई संयुक्त राष्ट्र सुरक्षा परिषद्मा उजुरी गर्न निर्देशन दिएको उल्लेख गरेको छ।

प्रधानमन्त्री कार्यालयका अनुसार लेबनानी सेना र संयुक्त राष्ट्र शान्ति सेना युनिफिल दुवैले छापा मारेर अनुसन्धान गरिरहेका छन्।

लेबनानका यातायात मन्त्री अली हामिदका अनुसार यो कार्य संयुक्त राष्ट्र सुरक्षा परिषद्को प्रस्ताव १७०१ को उल्लङ्घन पनि हुन सक्छ।

कात्तिक १८, २०८१ आइतबार ०९:१७:५३ मा प्रकाशित

उकेरामा प्रकाशित सामाग्रीबारे प्रतिक्रिया, सल्लाह, सुझाव र कुनै सामाग्री भए [email protected] मा पठाउनु होला।